Pisussaaffik eqquutsinneqanngilaq

Kalaallit Nunaata Radioa piffissami matumani sammineqarlunilu isummersorfigineqartorujussuuvoq. Qanoq suleriaaseqarnissaa qinikkaniillu qanoq sunniuteqarfiginiarneqassanersoq eqqartornianngilara, sammineqarneranili allaatiginnittartut arlallit saqqummiuttagaat oqaaseqarfigerusuppakka; tassalu tusagassiuteqarfiup suliassai suliarsartagailu.

Aallarniutigalugu erseqqissarlara, Inatsisartut inatsisaat naapertorlugu suliffeqarfiup ingerlanneqarnissaa pillugu qularnaatsumik ima allassimasoqarmat:
(Issuaaneq:) ”… KNR-ip siunertaraa Kalaallit Nunaanni innuttaasut tamakkerlugit aallakaatitassianik sullissinernillu tamatigoortunik nutaarsiassaqartitsinermut, qaammarsaanermut, ilinniartitsinermut, eqqumiitsuliornermut aliikkusersuinermullu tunngasunik (innuttaasunik kiffartuussinermi pisussaaffiit) tv, radio aamma internet assigisaalluunniit aqqutigalugit pilersorneqarnissaat qulakkiissallugu.”

Ullumikkut KNR-ip ingerlanera qiviaraanni takujuminaatsorujussuuvoq inatsit pisussaaffiliisoq suliffeqarfiup akisussaasuisa qanoq siamasitsigisumik eqqortinneraat. Tamatigoortuunissaanik aammalu kiffartuussinissaanut tunngatillugu oqaasertaliussat suliffeqarfiup eqquutsikkuminaatsittorujussuuvai, ullumikkummi ilaannakuuvallaarujussuartumik sullissivoq, nunammi ilaannamininngua kisiat sullippaa. Ilulissani, Nuummi Qaqortumilu sulisoqarpoq, nunalli sinnerani annerusumik sulisoqarani. Tamatuma kinguneraa, tusagassiat aallakaatitassiallu illoqarfinni taakkunaneernerusarmata, nunallu sinnera killeqarneroqisumik tusarfigineqartarluni.

Siamasissumik sullissisussaatitaanermi sumiiffinni pisoqarfiulluartartunik sullissiniarnissani KNR-ip sanngiiffigaa. Assersuutigalugu Qeqqa Kommuniani, soorlu Sisimiuni, pisoqarfiulluartartumilu nutaarsiassanik pingaarutilinnik tusagaqarfiuneq ajorpoq, naak illoqarfik nunatsinni anginerpaamut tulliugaluartoq inuttunerpaamullu tulliugaluartoq. Illoqarfimmi tassani ukiup kaajallakkaiartornerani inuiaqatigiinnut soqutiginartunik oqaluttuassaqqissunillu peqartuaannaavippoq, taamaattorli KNR-ip ”isiginngitsuusaarlugit” sammineq ajorpai. Nunatsinni illoqarfiit amerlanerpaat aamma taamatut soqutigineqanngillat.

TV-iikkut aallakaatitassiaq ”Nunatsinnit” sinerissamiit (aamma Sisimiuniit) takusassiisartutut oqaatigineqarsinnaagaluartoq, tassani takutinneqartartut suliaanerisa pitsaassusissaat iluatsippallaanngitsutut oqaatigisariaqarput, amerlanertigummi assiliaq ataasiinnangajak isiginnaagassanngorlugu suliarineqarsimasaramik. Suliat taamaattut aallakaatinneqassagunik assigiinnarsinnaagaluarpaa radiokkut tusarnaagassiatut aallakaatinneqartarunik. Aamma imarisaat oqaluttuartitsineruinnangajaavittarput, ullumikkut inuiaqatigiinni pissutsinut sammisaqarfiunatik, taamaattumillu tv-iikkut isiginnaassallugit soqutiginassusiat killeqarluni.

KNR siunissami nukittunerulluni ingerlalissaguni nunarput siammarfiginerullugu sulinissamut piareersartariaqalerpoq. Imaattariaqanngilaq illoqarfiit tamarmik tusagassiortoqartariaqartut, paarlattuanilli sinerissami aalajangersimasumik immikkoortortai ilaqqinneqarsinnaalluaraluarput, taakkunanngaanniillu sulinerit angalasarnernik aallaaveqartittarlugit ingerlanneqarsinnaallutik. Siamasissumik sullissineq anguneqassappat siunnerfiit taamaattut suliffeqarfiup eqqarsaatigisariaqalerpai, tamatigoortumimmi sullissinissamik inatsisitigut pisussaaffiligaaneq eqquutsitssallugu anguniarneqartariaqalerpoq.

Isiginnaagassiap aallartilernerani Anda Hansen nassuiaasoq

Isiginnaagassiaq eqqarsaatissiilluartoq

”Ortorujuup tumai atuarlugit” Anda Hansenip piviusulersaarusiaa, Sisimiuni Taseralimmi takutinneqaqqammerpoq. Isiginnaagassiami oqaluttuarineqarpoq piniartorsuusimasoq Otto Petersen, ilaquttanilu umiamik angallateqarlutik aavartartorsuusimasut. Ortorujuup kinguaavinit ilisarisimannittaanillu oqaluttuarineqarnerani erserpoq, angut pinngortitamut uumasuinullu ataqqinnittuullunilu atuilluartuusimasoq. Umiaannannguamik angallateqarlutik piniariartartut kingullersarisimasaattut oqaluttuarineqarmat, aamma ersersinneqarpoq atortuminut tamanut peqqissaartuullunilu nakkutiginnilluartuusimasoq.

Isiginnaagassiaq sukumiinerusumik qanoq imaqarnersoq maani oqaluttuarissanngilara. Qularinngilarali isiginnaarsimasugut isiginnaagassiap naajartornerani eqqarsaatissinneqartugut, qaqugorsuarmut nunatta pinngortitaanik atuinermi pingaartinneqartuartariaqartumik. Ortorujuup pingaartissimavaa, nuna piniarfini igitakunik qimatsivigineqartassanngitsoq eqqiluitsuutinneqartariaqartorlu. Ortorujummik ilisarisimannissimasut angumersisimasullu tamanna uppernarsilluarsimavaat, ilitsersuussutigiuarsimavaami nuna piniarfigisartagaq peqqissaarunneqartariaqartoq.

Isiginnaagassiami tamakku eqqartorneqartillugit takutinneqarpoq, ullutsinni nunami piniarfigisami peqqissaarussiunnaarluinnarsimanerup kinguneri. Eqqagassat sukujuillu maangaannaq qimaannakkat takullugit  tujuminarluinnarput nikallornarlutillu, takuneqarsinnaavormi nunamik suusupaginnilluinnartoqartartoq. Pissutsit taamaalisimanerat illuatungeqartariaqarmat, qujanartumik isiginnaartuusugut isumaliutissinneqarpugut pinngortitamik atuinerput taamaaginnarsinnaanngitsoq.

Naatsumik oqaatigalugu; pinngortitaq peqqissaarullugu atorluarneqarsinnaasoq isiginnaagassiami takutinneqarpoq, aammali ersersinneqarluni iluarpallaanngitsumik ullutsinni atorneqartartoq. Tamatuma isiginnaagassiami ersersilluarneqarnera isumaliutissiilluarpoq, neriuutigiinnarsinnaavarpullu nunatsinni pinngortitamik atuilluartarnissaq kinguaariinniit kinguaariinnut ilitsersuussilluartarnikkut ingerlanneqartassasoq. Taamaaliortuarnikkut nuna piniarfigisartagaq peqqissaaruttaraanni suli ukiorpassuarni ornittuarneqarsinnaavoq, nunatsinnilu piniariartarneq ullumimut atugaajuartarmat eqqaamajuassallugu pingaartittariaqarparput.

”Ortorujuup tumai atuarlugit” isiginnaarlugu malinnaalluarnartuuvoq, akunneratigullu illarnartunik oqartoqartarnera nuannequtaalluinnartarluni. Anda Hansen siusinnerusukkut piviusulersaarummik suliaqareersimavoq, aamma soqutiginarluinnartumik. Suliat taamaattut pisariariusaraluartut, neriunarpoq aamma allamik suliaqaqqissaguni aningaasatigut allatigullu tapersersorneqarluarumaartoq, piviusulersaarutimmi nunatsinni kulturimik oqaluttuartut isiginnaagassiatigut uppernarsaaserlugit pigineqartarnissaat pingaaruteqarpoq.

Anda qujanaq isiginnaagassiannut.

Anda Hansen Taseralimmi.

Eqeersimaarneq, nutaaliorneq, ineriartortitsineq naleqqussarnerlu KNR-TV-ip amigaatigai

Ukioq ataaseq qaangiussimalereerpoq KNR TV marlunnik kanaleqalermat. Isiginnaartartut aallaqqaataaniit maluginiarpaat, kanali pingaarnermi aallakaateqqititseqqiineq assut atorneqartoq, annerusumillu nutaaliortoqanngitsoq. Aallaakaatitseqqiisarnerni programmit qanganitsat toqqorsivimmeersullu aliannaarfigineqartarsimasut qularnanngilaq, amerlavallaarujussuartutigulli tamakku unnuppassuarni uteqattaarlugit takutinneqartarput.

2011-imi aasaanerani KNR ilisimatitsivoq, TV-mi aallakaatitassiornermut pisortaq nutaaq danmarkimi misilittagaqarluartorooq atorfinitsinneqartoq. Maanna ukiut marluk affaalu qaangiussimalersut pisortartaaq taanna aallakaatitassianik nutaanik ineriartortitsinermut qanoq sunniuteqartigisimanersoq ullumikkut takujuminaappoq, atorfinitsinneqarmammi taamani KNR-imi pisortaasup ilaatigut ima oqaaseqarfigaa: “ … annertuumik misilittagaqarnera, ersarissunik anguniagaqarnera aamma uteriitsuunera KNR-imi aallakaatitassiat ineriartortinneqarnissaannut iluaqutaassaaq.” Ullumikkut takujuminaappoq KNR TV-imi sunik anguniagaqarsimanersoq sunillu ineriartortitsisimanersoq, nunatsinnilu tv-iikkut isiginnaagassanik pitsanngorsaanissaminut uteriisersimanngilaq. Sutigut iluaqutaasimanera takujuminaappoq.

Nunatsinni pisortat akilersugaannik kanalinik isiginnaagassaqarneq annertusiallassimagaluartoq, nunatsinni nammineq aallakaatitassianik pinngortitsiniarneq ineriartortitsiniarnerlu annertuumik amigaataapput. Eqeersimaarneq, nutaaliorneq, ineriartortitsineq naleqqussarnerlu KNR TV-mi amigaatigineqartut pingaarnersarineraat oqallisigineqarlunilu isummersorfigineqarsinnaalluarpoq, taakkuali qulequtsiukkakkit aallakaatitassianik takutinneqartartunik nammineq malinnaasarnera aallaavigaara.

TV-iikkut takutitassiornermi eqeersimaartumik ingerlatsinissamik ujartuininnut pissutigaara, ullutsinni pisut sukumiisumik eqeersimaartumillu malinnaavigineqartarnissaat maqaasigakku. Aallakaatitassianik nutaaliorneq sammineqartussanillu isumassarsiorneq atorneqanngippallaarpoq, danskit oqartarnerattut; “sæsonimiit sæsonimut” nutaanik aallakaatitassiortarnissaq atorneqarnerusariaqarpoq. Eqeersimaarnerup, nutaaliornerup isumassarsiortuarnerullu aallakaatitassianik ineriartortitsineq malitsigissagaa qularnaateqanngilaq, misilittakkammi annertusiartortillugit periutsit suleriaatsillu inerisarneqartuarsinnaapput. Taakku malitsigisaannik tv-iikkut aallakaatitassiornermi naleqqussartuarneq ingerlanneqalissaaq, ineriartortuarnerummi malitsigisaanik tv-iikkut aallakaatitassiat naleqqussartuarneqarsinnaapput.

Ullumikkutut KNR TV-ip unittooqqasutut inissisimanera allanngortinneqassappat, aqutsisoqarnikkut nutaaliorfigineqartariaqarpoq. Eqeersimaartut, nutaaliortut, ineriartortitserusuttut naleqqussartuarusuttullu aqutsisuulernissaat siunnerfigineqartariaqalerpoq, tusagassiuuteqarfimmi inuiaqatigiit akilersugaat ullumikkutut ingerlaannarsinnaanngilaq. KNR TV inuiaqatigiinnit soqutigineqarluni isiginnaarumaneqarluartartoq pilersinneqartariaqalerpoq, siulersuisullu piumassuseqarunik tamatumunnga aqqutissiueqataasariaqalerput.

Illoqarfik tusagassiuuteqarnikkut siuarsaqqinneqarli

Illoqarfimmi Sisimiuni tusagassiuteqarfiit suleqataaffiginikuullugit, ukiuni makkunani kingumut qiviarnanngitsuunngilaq. Illoqarfipput tusagassiuteqarnikkut kinguariarsimavoq – kinguariangaatsiarsimavoq – taamak oqarusunnarneruvoq.

Lokalimik tusagassiuutit radio tv–lu 1990-ikkunni ingerlalluaruttuleramik uummaarissimaqaat, tusarnaarterpassuaqartarlutik isiginnaarterpassuaqartarlutillu. Illoqarfitsinniinnaanngitsoq aammali nunarput tamakkerlugu maluginiarneqarluartarsimapput, tusarnaaruminartunimmi isiginnaaruminartunillu suliaqarfiusarsimapput. Ullumikkut tamakku tamarmik oqaluttuaannanngorput, taamaammallu tusagassiuuteqarfinnik sunniutaarussimasunik taajumaneruvakka.

Illoqarfipput nunatsinni inuttunerpaamut tulliugaluartoq, ajuusaammernanngitsuunngilaq tusagassiuuteqarnermigut ingerlalluarsimagaluarluni maanna taamatut inissisimalermat. Soorunami sulisuusarsimasut taakkunanngalu siulersuisuusarsimasut aamma allanngorsimapput, tamakkulu peqqutaaqataanngitsoorsimanavianngillat lokalimik tusagassiutit ullumikkutut ingerlalersimanerannut. Ingerlalluarallaramik illoqarfimmi pisunut malinnaalluarlutik tusagassiisarlutillu takusassiisarsimapput, eqeersimaarlutik innuttaasunillu akuutitsilluarlutik. Tiguaallaqqittarsimapput malinnaatitsillaqqittarlutillu, tusarnaartartut isiginnaartartullu peqataaffigerusutaannik.

Illoqarfitsinni tusagassiuutigut ingerlallualeqqissappata, taakku aqutsisui siulersuisuilu iliuuseqartariaqalerput. Eqeersimaartuuleqqissagunik siunissamut naleqqussartariaqalerput, aaqqissuusseqqillutillu. Ullumikkutut tamarmik immikkut peqatigiiffittut ingerlanertik nalilersuiffigeqqittariaqalerpaat, tamarmimmi immikkut aningaasarsiornikkut ingerlaniarnertik ajornartorsiutaasunut ilaasoq nassuerutigisinnaasariaqarpaat, oqaloqatigiissutigalugulu qanoq iliorunik aningaasarsiornikkut ilorraap tungaanut ingerlalersinnaanerlutik. Qularutissaanngilaq aningaasaqarnikkut ajornartorsiuteqartuaannalerneq sulisussaqarniarnermut killiliisuusartoq, tusagassiortutummi ilinniarsimasunik sulisoqassagunik imminut akilersinnaasumik ingerlatsilernissartik allaqqussinnaanngilaat.

Patajaatsumik eqeersimaartumillu ingerlaleqqinnissaq anguniagaaniarli. Tusagassiortunik sutigut tamatigut suliaqarsinnaasunik sulisoqalernissaq anguniagaaniarli. Tamatigoortumik suliaqarsinnaasut sulisorineqalerunik qularutissaanngitsumik ingerlallualeriartornermut aqqutaassapput. Inuiaqatigiinni pisunut nutaarsiassalerineq pingaartinneqartunut ilaasariaqarpoq, illoqarfitsinnimi pisartut soqutiginarsinnaasorpassuit ullumikkut oqaluttuarineqaratik sammineqaratillu qaangiataaginnarneqartalersimapput. Aliikkutassaqartitsinerit naalaartartunit isiginnaartartuniillu soqutigineqarluartarmata siuarsaavigisassanut ilaasariaqarput, taakkumi aqqutigalugit naalaartartut isiginnaartartullu peqataatinneqarluarsinnaasut takoreerparput.

Sisimiut tusagassiuuteqarnikkut ingerlallualeqqissappata, taakkunannga ingerlatsisut siulersuisullu kaammattorusunnarput ataatsimuulernissartik anguniartariaqaraat. Radio, tv lokal aviisilu ataatsimuulersillugit, tamarmilli suliamikkut immikkoornerat ingerlatiinnarlugu. Anguniagaaniarli aningaasaqarnikkut aaqqissuussaanikkullu ataatsimoortumik tunngaveqalernissaat, taamaalillutik aningaasarsiornikkut patajaatsumik ingerlalersinniaaniassammata, minnerunngitsumillu suliamikkut siuarsarniassammata ingerlallualeqqillutillu.

Ataatsitassarsiornermut politikki ataatsimoorussaali

Nunatsinni aatsitassarsiorneq aallartinneqartinnagu partiit Inatsisartuuniititaqartussat aatsitassarsiornermut politikkissaq ataatsimoorullugu isumaqatigiinniutigisariaqarpaat, inatsit qanoq piumasaqaatitaqassanersoq tamarmik peqataaffigalugu.

Nunatta pisuussutai uumaatsut inuiaat nunatsinnut innuttaassuseqartut tamarmik pigivaat, piiarneqalerunillu aningaasarsiornikkut nunatsinni innuttaasunut tamanut iluaqutissanngortittariaqarput, ukiuni aggersuni siunissamilu qinersinermiit qinersinermut partiit sorliit aqutsisuunersut apeqqutaatinneqarani.

Massakkut qineqqusaarnermi partiit tamarmik erseqqissumik oqaatigisarpaat, aatsitassat piiarneqalerunik nunatta aningaasatigut iluanaarutigisariaqarai. Akileraarusersueriaaserli qanoq ilusilersugaq inatsisiliornikkut tunngavigineqassanersoq partiit ataasiakkaarlutik kissaateqarfigimmassuk, partiit politikerillu kaammattorusunnarput apeqqut taama nunatsinnut pingaaruteqartigisoq aatsitassarsiornermut inatsisissaq ataatsimoorlutik isumaqatigiinniutigisariaqaraat.

Nunarput aatsitassarpassuaqarpoq ukiorpanni piiaaffigineqarsinnaasunik. Tamakku piaarneqarnissaat isumatuumik pilersaarusiorluagaasariaqarpoq, minnerunngitsumillu inuussutissarsiutinut allanut malitsigisassaannut naleqqusaavigineqarlunilu ilinniartitsivigisariaqarpoq, inuussutissarsiornermillu ingerlataqartut akornanni suleqatigiinneq patajaatsoq tunngavilertariaqarluni.

Aatsitassarsiortitsiniarneq partiitut ataasiakkaatut qineqqusaarutaanani ataatsimoorussaali, pisuussutimmi uumaatsut tamatta pigaagut, taakkulu nunatta aningaasarsiornikkut suliassaqartitsinikkullu siunissatsinnik isumannaatsumik qulakkeerinneqataasussaapput.

Qineqqusaartitseriaaseq nutarterneqarli

Inatsisartunut qineqqusaartitsinerit aappassaat tv-iikkut radiokkullu ingerlanneqareersullu, piffissanngorpoq qineqqusaartitseriaatsip nutarterneqarnissaa. Qineqqusaartut taama amerlatigisut piffissarlu atugassarititaasoq sivikitsigisoq, qineqqusaartut ataasiakkaatut saqqummersinnaanerat killeqarpallaaqaaq, qineqqusaartummi ataasiakkaatut isummersuutaat qineqqusaarutaallu sukumiinerusumik paasisaqarfigisalernissaat aatsaat taamak pingaaruteqartigigaluarpoq.

Qinersinissap tungaanut qineqqusaartut ataasiakkaatut tusarneqassappata inuttullu ilisarineqarnerussappata KNR allaanerusumik periarfissiisariaqalerpoq, qularnaateqanngitsumimmi massakkutut aallakaatitsisarnerit ingerlanneqartillugit qineqqusaartut ataasiakkaat sukumiinerusumik tusarfiginissaat periarfissakitsuararsuuvoq.

Qineqqusaartut amerlanerit tusarneqarnissaat periarfissinneqaqqullugu, KNR radio aaqqissuussisinnaasariaqarpoq qineqqusaartut ataasiakkaarlugit sukumiisumik apeqqarissaarfigineqarnissaannut. TV-iikkummi periarfissiinissaq ajornakusooreeqimmat, radio periarfissiinissamut piukkunnarnerujussuuvoq.

Assersuutigalugu; qineqqusaartut ataasiakkaarlugit sivikinnerpaamik minutsini 15ini 20niluunniit periarfissinneqarlik radiokkut toqqaannartumik apeqqarissaarfigisarlugit, soorlu inuttut ilisaritillugit, qineqqusaarutaannik saqqummiisillugit, kingornalu tusagassiortuniit apeqqarissaarfigineqarlutik. Taamatut periarfissiinikkut qineqqusaartut kisimik pinnatik aammali qinersisartut, periarfissinneqassapput sukumiisumik isummersortinneqarnissaminnut.

Qineqqusaartut amerlaqaat, taamaammallu taamatut ilisaritinnissaat apeqqarissaarfigineqarnissaallu ataatsikkut ingerlanneqartariaqarani. Assersuutigalugu; qineqqusaartut arfinillit ullormut sammineqartarsinnaapput, taariikkattut inuttut ilisaritillugit, qineqqusaarutaannik saqqummiisillugit kiisalu apeqqarissaarfigalugit. Siunnersuutigerusunnarporlu taamatut periarfissiinerit unnukkut ingerlanneqartassasut, taamaalilluni naalaartartunit amerlasuunit malinnaavigineqarsinnaanerat peiarfissaqarniassammat.

Nunarput isorartoqimmat, qineqqusaartullu siamasissumik najugaqarmata, oqarasuaatikkut attavigalugit sammineqarsinnaapput, Nuummilu najugaqartut radiop aallakaatitsivianut aggersarneqarsinnaallutik.

Nunarput ukiuni makkunani nunanit allaniit taama soqutigineqartigalunilu sammineqartigisoq, Inatsisartuni politikerinngorniartut sukumiinerusumik qinersisartutut ilisarinerusariaqarpagut, isumaqarpungalu qineqqusaartut ataasiakkaatut inuttut ilisaritinnissaannut qineqqusaarnissaannullu periarfissikkutsigit, qinersisartutut paasisimasaqarnerulluta qinersiartorsinnaalissasugut.

Soorlumi igitaalluni

Aasaq sulinngiffeqarfigereerlugu qasuersimasutullu misigisaqarfigereerlugu, suliartoqqinnissarlu qilanaaralugu nukissaqarfigilluarlugulu, suliartoqqinnissara aqaguaguusaannannguanngortoq ilisimatinneqarpunga sipaarniarneq pissutigalugu soraarsinneqalersunga. Sunaaffa akunnerup ataatsip ingerlanerinnannguani inuuneq nuanninngilluinnartumut mumisinneqarsinnaasoq. Eqqarsaatimmi amerlasuut tassanngaanniilli takkussuutilerput, ilami siornatigut suliffimmiit soraarsitaaneq misiginikuunagu apeqqutissarpassuit takkuteriataaramik.

Nikallornarnerpaavoq nunama aqutsisuisa piumasariuarsimasaattut ilinniagaqarsimalluni, inuiaqatigiinnilu pisussaaffeqartutut misigisimalluni, tassanngaannaq atorfissaqanngitsutut misigititaalluni. Soorlumi atorfissaqanngitsutut igitaalluni. Misigisannit oqaasinngortitakka immaqa sakkortugaluarput, kisianni tassa misigisaq taamaappoq.

Inuuneq artornartoqartaqisoq aqqusaartarsimavara, nukittuniarnerulli artornartut ajugaaffigisinnaagai nalunngilluarpara. Aamma nalunngeqaara inuuneq artornarsigaangat qaratsamut uummammullu qanoq nukillaartitsisinnaatigisoq. Eqqarsaatit nuanninngitsut qarasaq arriitsunnguamik aserorsarlugu mangiarusaalertarpaa, qaratsallu nuanniilliortup uummat arriitsunnguamik nukillaariartulersittarpaa, soorluli aak kinernerulersittaraa. Taama misigisaqarneq aqqusaartarsimavara, inuunermulli isumakkeerinnittuunissamik asannittuunissamillu perorsarneqarsimagama qujanartumik nuanniilliuutit artorsaatillu qaratsannik uummatinnillu nukillaartitsiartunnginnissaat akiorsinnaasarsimavara.

Ullunili makkunani artornartut nalaanniippunga. Misigisaq nuanniitsoq, eqqarsaatit apuuffissaqanngitsutut akissutissaqanngitsutullu ittut takkuttarlutillu qimaguteqqittarput. Qularinngilarali tamakku peqqinnanngitsumik qaratsannik uummatinnillu mangiaruusaaqqalersut, nikalloraluttuinnartitsilersullu. Akiuunniaraluarpunga, imaak; suli akiuuppunga, aamma suli akiuutissaanga. Ullorpassuit kingulliit qamani kamaqqasimaqaanga, soorluli kingorna saammaqqittussaanngitsutut misigisimallunga.

Soormiuna taamarsuaq nikallornartigisumik misigisimasunga? Pissutigalugu isumaqaraluarama ilinniarsimasannut suliannullu sapernanga, ingammillu suliffinnut naammaginartumik tunniussisarsimassallunga. Pissutigalugu isumaqaraluarama ilinniarsimasara aamma inuiaqatigiit atorfissaqartikkaat, ilinniarsimasuugamalu nunanni atorfissaqartuassallunga. Nalunngilara kinaluunniit soraarsitaasinnaasoq, suliffeqarfimmilu aningaasaqarneq pitsaasuunngippat soraarsitsisoqarsinnaasoq. Nalunngilara pingaarnersiuisoqarsinnaasoq, uani uanilu sulisut allat atorfissaqarnerusimappata. Nalunngilara aamma kinaassusersiortoqartartoq, iluarinngisat iluarisalluunniit sulisorissallugit sulisoriumanagilluunniit qiniataaginnarneqarsinnaasut.

Ilinniarsimasarli tunuliaqutaralugu suliffissaqanngikkaanni taava? Nunanni atorfissaqanngitsutut misigisimaguma taava? Ullumimut suli akissutissaqanngilanga, sulilu nalornivunga.