Sapaatip akunnerata naasui

Sisimiut Tusaataat-ni aasaanerani paarlattaaninni sapaatip akunnerata naasuinik tallimanngornikkut tunniussisarpugut Centrum Kiosken suleqatigalugu. Tunineqartussat naalaartartuniit innersuussutigineqartarput, tunineqaleraangamillu tupaallatsinneqartarput. Tunniussileraangatta toqqaannartumik aallakaatittarparput. Sapaatip akunnera 30. Tallimanngorneq 24. juli 2009, Qeqqata kommuneani Inunnik Isumaginnittoqarfimmi Souschef Clara Olsen sapaatip akunnerata naasuinik tunineqarpoq, suleqataasa ilaannit Margrethe Jørgensenimit aammalu sullitaasa ilaanni Peter Ernst Frederiksenimit innersuussutigineqarluni. Suleqataanit tunngavilersuutigineqarpoq qaammatini kingullerni Clara ilaqutailu imaannaanngitsumik atugaqarsimagaluarlutik Clarap suliffimmini qiimajuartuusimammat suleqatikkuminartuaannarlunilu, naak aamma suliffiat ulluinnarni nukippassuarnik atuiffiusaraluartoq. Sullitaata tunngavilersuutigaa Clara sullitaminnut pimoorussilluni ikiuulluartarmat ilaqutariit sullinneqartut ajunnginnerpaamik atugassaqartikkumallugit.

Sapaatip akunnera 29. 17. juli 2009. Naasunnatsinneqarpoq Nielsine Møller, ukiut 40-t sinnilaarlugit KGH-mi kingorna Pisiffik-nngortumi manna tikillugu allaffimmiuusoq. Nielsinep suleqataata Najaaqqap innersuussinermini tunngavilersuutigaa Nielsine pisiniarfilerinerup iluani allaffissornerup tungaatigut ilisimasarpassuani atorlugit ilinniartitsilluartarsimammat, minnerunngitsumillu suleqatikkuminartuummat. Suleqataata Poul Olsenip ilaatigut aamma eqqaavaa pisiniarfiup iluani suliassanut tunngasunut sulisut nalornisigisaqaraangata Nielsine amerlanertigut apereqqaarneqartartoq, ukiorpassuarnimi sulinermini pisiniarfiup ingerlanneqarneranut tunngasunik ilisimasarpassuaqarpoq.

Palasip Qaqqaani

5. juli 2009. Ilaquttakka taamaallutik pilerput Palasip Qaqqaa qaqiniarlugu, unnulaalereersorlu majuarlutik. Arfiniliullutik aallarput, aqqutaanili Paninnguaq (angajulliliarput) utiinnarsimavoq ilanigooq aqqutaanngitsukkuuginnarmata. Assiliisut: Ngannga & Kira.

Majuaqatigiilersut tassapput saamerlerniit, Kira (nukarliliarput), Angunnguaq (Tupernap aappaa), Ngannga (nuliara), Paninnguaq (angajulliliarput), Arnaq (nuliama angajua) kiisalu Tuperna (Arnap pania).

Tuperna Nganngalu majuarujoortut. Majuarujoornerminni Nasaasaaq (Sisimiut ilisarnaatigilluagaat) nuisatilaarlugu assilisimavaat.

Illoqarfipput Sisimiut, Palasip Qaqqaata qaavaniit isigalugu.

Palasip Qaqqaata qaarpiaa, 550 meterit missiliorlugu portussuseqarpoq.

Kira, illoqarfik Sisimiut inunngorfini tunuliaqutaralugu.

Ngannga, Palasip Qaqqaani inussuit anginerpaartaasa killingani.

Kira anaananilu Ngannga.

Saamerlerniit Angunnguaq, Tuperna, Kira, Arnaq, Ngannga.

Nukariit Arnaq aamma Ngannga.

Assiliivik automatertillugu imminnut assilisimasupajuupput.

Angunnguaq Berthelsen aamma Tuperna Møller.

Ngannga aamma Kira Sisimiut tunuliaqutaralugu.

Palasip Qaqqaata inussui.

Unnuap qeqqariartortoq ammukarlutik aallaannaqaat.

Aqqutaani ukaleq naammattoorsimavaat.

Kira qasukujulerluni ingiinnarsimavoq, assiliteriaramilu kiinnani assikujussimallugu :-)

Kugssak 45 inuusuttuni pissartanngorput

25. juli 2009. Inuusuttut isikkamik arsaallutik pissartanngorniunnerat Sisimiut arsaattarfianni naammassineqarmat finalemi Kugssak 45 (Qasigiannguit) Nunatsinni pissartanngorput UB-83 Upernavimmiut 3-0-mik ajugaaffigalugit.

Kugssak 45 ajugaasimaarluavipput, præmiesereeramillu ingerlaannaq aallariartorput.

Ajugaasut assilisimmata qulaaniit isigalugit. Isiginnaariat Kugssak 45-mik illersuisut amerlannguatsiavipput, nuannateqaallumi. Pokali tunniunneqarmat nuannattunnguaqarpoq.

Præmienik agguaasuupput aaqqissuisut SAK-meersut sinnerlugit Fali Kleist (saamerleq) aammalu dommerit peqatigiiffiat sinnerlugu Kristian Lyberth (Akarteq).

Pissartanngorniunnermi nr. 2-nngorput UB-83 (Upernavik), finalemilu ajorsaraluarlutik nuannateqaat angusarissaaramik.

Klubbit assigiinngiiaat arsaattui Ukioq manna arsaqatigiit-tut (Årets Hold 2009) toqqarneqarput, klubbinit ukunaneersuunerusut, Kugssak, UB-83, B-67 aamma Nagdlúnguaq 48.

Ukioq manna akiuutillammattut (Årets Fighter) toqqarneqarpoq Nukarleq Knudsen, UB-83.

Ukioq manna arsalerillaqqissutut (Årets tekniker) toqqarneqarpoq Ittukusuk Isaksen, Kugssak 45.

Ukioq manna arsaatillammattut (Årets ungdoms-spiller) toqqarneqarpoq Hans Karl Berthelsen, B-67.

Inuusuttut pissartanngorniuttut, 2009

Isikkamik arsaattartut inuusuttut Nunatsinni pissartanngorniunnerat Sisimiuni ingerlanneqarpoq julip 20-aniit 25-at ilanngullugu. Holdit arfinillit sinerissameersut peqataapput, assinilu takuneqarsinnaapput holdit sorliunersut suminngaanneersuunersullu.

UB-83, Upernavik.

Nagdlúnguaq 48, Ilulissat. Kugssak 45, Qasigiannguit.

SAK, Sisimiut.

B-67, Nuuk.

Eqaluk 54, Tasiusaq (Nanortalik).

Sisorartartut aasami sungiusartut

19. juli 2009. Sisoraatinik oqilaniuttartut (unammisartut) sinerissameersut sapaatip akunnera Sisimiuni sungiusaqatigeereerlutik naggataarlutik Sisimiut arsaattarfianni oqilaniupput. Ullut siuliini rulleski-nik aqqusinermi sungiusartarsimapput, arpattarlutik nukissarnernillu assigiinngitsunik sungiusarsimallutik. Aajukua arsaattarfimmi naammasseqqammersut.

Kâgssagssuk utoqqasaani pissartanngorpoq

Utoqqasaat pissartanngorniunnerat tallimanngornermi 17. juli naammassineqarmat Maniitsormiut Kâgssagssuk pissartanngorput, Nûk 8-0 -mik ajugaaffigigamikku. Unammisaqattaarnerit nuannivissumik ingerlanneqarput Sisimiormiuniillu isiginnaariarneqarluartarlutik.

Sisimiut arsaattarfiat qulaaniit isigalugu.

Maniitsormiut Kâgssagssuk ajugaareerlutik nuannattunnguupput. Iluliarmiut Nagdlúnguaq 48 nr. 3-nngorput SAK ajugaaffigigamikku.

Kâgssagssuk-mi anføri Tønnes Kaka Berthelsen isertitseriartoq isertitsillunilu.

Kâgssagssuk-mi anførip Tønnes Kaka Berthelsenip pokali tiguaa.

Nuannaarutissaqarpullumi ajugaasut, qungujulaannguaq. Pissartanngoqataavoq Inatsisartunut ilaasortaq Karl Lyberth (saamerleq), qiterliuvoq Gerhardt Petersen, pingajuata atia eqqaamanngilara.

Utoqqasaat pissartanngorniuttut - Sisimiut 2009

Isikkamik arsaalluni utoqqasaat pisortatigoortuunngitsumik pissartanngorniunnerat julip 13-ianiit 17-ianut Sisimiut arsaattarfianni ingerlanneqarpoq. SAK aaqqissuisuuvoq, illoqarfiillu klubbinik peqataatitaqartut tassaapput Ilulissat, Sisimiut, Maniitsoq aamma Nuuk.

Unammisaqattaarnerni inernerit pissarsiarigallakkakka makkuupput:

Ataasinngornermi:

I 69 - Kâgssagssuk: 1-4

N 48 - S 68: 3-2

Nûk - SAK: 0-3

Marlunngornermi:

N 48 - Kâgssagssuk: 0-3

I 69 - SAK: 2-3

S 68 - Nûk: 2-3

SAK - Kâgssagssuk: 0-2

Pingasunngornermi:

I 69 - N 48: 1-3

Nûk - Kâgssagssuk: 1-0

S 68 - SAK: 1-1

N 48 - Nûk: 0-3

Sisamanngornermi:

S 68 - I 69: 6-3

SAK - N 48: 2-1

S 68 - Kâgssagssuk: 0-3

I 69 - Nûk: 0-2

Tallimanngornermi:

(Nr. 3-nngorniunneq)

SAK - N 48: 2-3

Finale

Kâgssagssuk - Nûk: 8-0

SAK - Sisimiut

S 68 - Sisimiut

Kâgssagssuk - Maniitsoq

Nûk - Nuuk

Nagdlúnguak' 48 - Ilulissat

I 69 - Ilulissat

Sapaatip akunnerata naasui, kajumissaatitut Aasaanerani Sisimiut Tusaataanni paarlattaallunga majip naajartorneraniit sulivunga, ullaakkut qulingiluaniit ullup qeqqanut toqqaannartumik radiokkut aallakaatitseqataasarlunga. Maji naajartortoq tallimanngornikkut aallakaatitsigaangatta "Sapaatip akunnerata naasui" innuttaasut ilaannut tunniuttalerpagut pisiniarfeeraq Centrum Kiosken suleqatigalugu, radiomilu naalaartartut innersuussuteqartittarlugit. Tunineqartussaq tupaallatsillugu ornittarparput, siumoortumimmi ilisimareerneq ajorpaa. Taamatut kajumissaatinik tunniussisalerneq naalaartartunit soqutigineqarluarsimagami innersuussuterpaaluit takkuttalerput, paasinarporlu radiokkut toqqaannartumik taamatut aallakaatitsisarneq malinnaaffigineqarluartartoq. Ataani assit ikkussorneqarsimasut oqaluttuaraat "Sapaatip akunnerata naasui"-inik tunineqarsimasut kikkuunersut aammalu suut tunngavilersuutigineqarsimanersut. Sapaatip akunnera 22. Tallimanngorneq 29. maj 2009. Timersortarfiup ningiua Marianne Olsen naasunik tunineqarpoq, timersortarfimmi atuisartut arnat utoqqalisut pingasut innersuussinerisigut. Tunngavilersuutigaat, Mariannep illorsuaq timersortarfik ornikkuminartuutinniarlugu illorsuaq paarilluarmagu, eqqiluitsuutillugu, iseruminartuutillugu kiisalu sullissineq pitsaasuutillugu. Naasunik tunniussisuuvoq Sisimiut Tusaataanni pisortaq Jens Klaus Lennert (Kasik).

Sapaatip akunnera 23. Tallimanngorneq 5. juni 2009. Permagreen-imi sanasoq/innaallagisserisoq Åge Hans Evaldsen naasunnatsinneqarpoq, innersuussisoralugu Inge-Lise Dahl. Tunngavilersuutigaa, Åge Hansi inuttut ikiuukkumatuujummat aammalu nuliami ukiorpassuarni angerlarsimaffimminni meeqqanik paarsisartuunerani nuliaminut tapersersuilluartuusimammat kiisalu ilaquttami ikinngutimillu sunngiffimminni suliniutini suleqataasarneranni nerisassat tungaasigut isumagilluartarsimammagit iggattarlugit allatigullu pisariaqartitaannik sullittarlugit. Saamerliuvoq Sisimiut Tusaataata pisortaa Kasik naasunik tunniussinermi tunngavilersuutit atuarai, qiterliuvoq Åge Hansip suleqataa Jørgen Barselajsen, kiisalu Åge Hansi.

Sapaatip akunnera 25. Tallimanngorneq 19. juni 2009. Piareersarfimmi ilinniartitsisoq Lene Michelsen ilinniartut ilaannit Jakobine Lennert-imit (talerpillermi isorleq) innersuussutigineqarluni naasunnatsinneqarpoq, Piareersarfimmi atuarsimasut naggataarlutik Taseralimmi allagartartaartinneqarnerat ingerlanneqaleruttortoq. Tunngavilersuutigineqarpoq Lenep ilinniartitsisutut atuartitani annertuutigut tapersersortuartarsimammagit, allaat uniinnarniaraluartut ikiorlugit ingerlaannarnissaat qulakkeertarlugu. Ajornartorsiutinut sunulluunniit qaangiisitsiniarluni oqaloqateqarnissaminut piffissaqartuartarsimavoq allaallu ilinniagassat tungaasigut ikiortariaqartut unnukkut ikiortarsimallugit, taamaalillunilu atuartut nakkaannarnissaraluat amerlasuutigut pinngitsoortittarlugu. Lenep assiliseqatigai ilinniartitsisoqatini marluk Elisabeth Jensen (saamerleq) aamma Johanne Olsen, kiisalu innersuussisoq Jakobine.

Sapaatip akunnera 26. Tallimanngorneq 25. juni 2009. Ellen Møller (saamerleq) Sanaartornermik Ilinniarfimmi allaffimmiuusoq naasunnatsinneqarpoq, suleqatiminit Susanne-mit innersuussutigineqarluni. Tunngavilersuutigaa Ellen-i sisamanik qitornaqarluni anaanatullu kisimiittuulluni inuttut nukittunera. Qitornaa ataaseq innarluuteqartuusimavoq, ulluinnarnilu suliffimmini ulapputissaqartaraluaqaluni suleqatiminut qiimmassaasarsimavoq ilakkuminartuullunilu, tamakkulu tunngavigalugit naasunnattussatut innersuussutigineqarpoq. Ellenip suleqatini assiliseqatigivai, saamerlerniit Ellen, Astrid, Ane-Katrine, Rita, Susanne kiisalu Fartato.

Sapaatip akunnera 27. Tallimanngorneq 3. juli 2009. Naasunnatsinneqarpoq Pilersuisoq A/S-ip qullersaqarfiani allaffimmiu Heidi Ramsøe, suleqatiminit Inger Eriksenimit (talerpilleq) innersuussutigineqartoq. Tunngavilersuutigaa, Heidip ulluinnarni suleqaterpassuarmi akornanni suleqatigiit sunngiffimminni sammisassaqaqatigiittarnissaat. Soorlu suliffeqarfiit timersornikkut unammiuaartinneqassagaangata Heidip suleqatini peqataatinniarlugit kaammattuiuartuusimavoq, imaluunniit suleqatigiit katerisimaalaarnissaat kaammattuutigisarlugu.

Sapaatip akunnera 28. Tallimanngorneq 10. juli 2009. Aappariit danmarkimi Holbæk-imi najugaqalersimasut Daniel aamma Rigmor Lennert naasunnatsinneqarput. Daniel (84-inik ukiulik) aamma Rigmor (80-inik ukiulik) 1956-imiit 1965-imut Sisimiuni ilinniartitsisuusimapput aammalu Narsami ilinniartitsisuusimallutik. Aappariit Sisimiunut tikeraanerat iluatsillugu atuartitarisimasaat 1949-imi inunngorsimasut arlaqartut katersuupput, taamanilu atuartuunerminni pisimasunik ilinniartitsisorisimasatik peqatigalugit eqqartueqatigiilaarnissaminnut periarfissaqarlutik. Naasunnatsinneqarnissaannut tunngavilersuutigineqarpoq aappariit Sisimiuniinnerminni atuarfeqarfimmi sulilluarsimammata, marluullutimmi 1949-imi inuusimasut klasse-ni marlunni klasselæreriusimapput, Danielilu piffissap ilaani aamma skoleinspektøriusimalluni. Innersuussisuuvoq atuartitarisimasaasa ilaat Pavia Olsen, aamma Rigmor-imut kusanartuliaminik tunissuteqarsimasoq (tigumiaa). Aappariit naasunnatsinneqarmata atuartitarisimasaasa ilaat Mina Lennert Pedersen (talerpilleq) najuuppoq.