Aqquserngup sinaani pisuinnaat aqqutaat

Illoqarfitta aqquserngi angallaffiusorujussuanngornikuummata aqquserngit sinaani pisuinnaat aqqutaat inerisartariaqarput, ingammik periarfissaqareersut asfaltimik imaluunniit cementblok-kinik qallerlugit. Qallersuinikkut pujoralak aasami panernarnerani taamaalilluni pinngitsoorneqarsinnaalissagaluarpoq aammalu angallannermi pisuinnaat angallannermi isumannaatsumik aqqutissaat erseqqinnerulissagaluarput.

Umiarsualiviup tungaanut aqquserngup sinaa sioraannaasoq pisuffiliornissaanut periarfissaqareerpoq.

Pisuffiit maannakkut sioraannaasut pujoralannartullu kalaaliminernik nerisassanik tuniniaaffigineqartarmata qallerneqarnissaat pingaaruteqarpoq.

GTO-pladsitoqaasimasup eqqaaniit qummukajaap sinaa (saamiatungaa) isumannaannerusumik aqqutiliorneqaruni angallannermut iluaqutaasinnaaqaaq.

Qummukajaarsuaq alleq talerpiatungaatigut illu tungujortoq tikillugu pisuttarfiliorneqarnissaminut periarfissaqareerpoq, asfaltimik imaluunniit cementblok-kinik qallerneqaraluaruni pujoralannarunnaassagaluarpoq.

Illup tungujortup nalaaniit qallikkamik pisuffissialiorluni nanginneqarsinnaavoq (saamiatungaa).

Assimi takuneqarsinnaasutut pisuinnaat asfaltikkap sinaarpiaa amerlanertigut aqqutigikkajuppaat angallannermut ulorianarsinnaasumik. Pisuffissiaq qalligaaguni qularnanngilaq pisuinnaat aqqutiginerulissagaluaraat.

Qummukajaaq alleq saneraaniit ammut isigalugu.

Qummukajaap alliup sinaani pisuinnarnut inuit aqqutinnaavat ilusilerluakkamik aqqutiliorneqaruni iluaallassagaluaqaaq.

Umiarsualiviup eqqaani quersuaqarfip KNI-eqarfiullu aqquserngata sinaa isumannaannerusumik pisuffissaqqinnerusunngortinneqarsinnaavoq, umiarsuaqartillugumi pisuinnarnit angallaffigineqartartorujussuuvoq.

Aqqusinersuaq blok 15-ip eqqaaniit Højskole tikillugu pisuffiliorneqarnissaminut (saamiatungaa) periarfissaqarluarpoq, angallannermullu isumannaallisaataassalluni.

Pisuinnarnut aqqutiliorneqaruni aamma pujoralannarunnaassasoq qularnanngilaq.

Timersortarfiup ataatungaani Aqqusinersuup sinaa pisuffissialerneqarnissaminut periarfissaqarpoq, ukiorpassuarnilu sioqqat qaleriiaaginnarnikut piiarlugit qallikkamik pisuffilioruni tamaani angallannermut isumannaallisaataassaqaaq.

Brugsenip silataaniit kangimut aqquserngup sinaa pisuinnarnit aqqutigineqartartorujussuaq sioraannaajunnaarlugu Blok 12 tikillugu (talerpiatungaani blokki qaninneq) qallertariaqarpoq.

Allakkerisarfiup eqqaani pisuinnarnut aqqut qallikkamik silinnerulersinneqarsinnaavoq, sioqqallu qaleriiaaginnalersimasut piiarlugit pisuffiup avataa kusassarlugu.

Allakkerisarfiup tungaaniit Taseraliup tungaanut aqquserngup sangoriaa tikillugu pisuttarfiliorneqaruni angallannermut isumannaallisaataassaaq.

Adammip aqquserngata sinaani pisuffiliortoqarnikuummat qujanaqaaq, aqqulli taanna pujoralannarunnaarlugu qallerneqaruni iluaqutaassaqaaq.