Peertariaqakkat / torersartariaqakkat

Ukiuni arlaqalersuni illoqarfitsinni takussaasunut ilaapput igitakut maangaannarlu qimagakkat, isumaga malillugu illoqarfiup kusanartuunissaanut pinnersaataanngilluinnartut. Tamakku iginneqartariaqarput illoqarfiup iluani takussaajunnaarlugit, maangaannarmi eqqakkat illoqarfippalaartitsinngilluarnarmata.

Illoqarfiup kangiatungaani kolligiet eqqaanni tamassa balletsikut qisuillu qimaannakkat, aammalu toqqaviliaq naammassineqanngitsoq. Angallaffiup sinaani pinnersaataanngilluinnartut ingerlaannarlu piiartariaqartut.

Kangiatungaani kolligiet eqqaanniipput biilikut marluk atorunnaarsimasut ingerlaannarlu peertariaqartut.

Biilikut kommunemit allagartalerneqarsimapput qaammatit pingasut qaangiutsinnagit piginnittuminnit peerneqartariaqartut. Pappialap ikkunneqarfia junip 29-ani ulluligaavoq, inuttaalu qisuarianngippat aatsaat septemberi naalerpat peerneqarsinnaapput, tassa aasarsuaq naallugu takussunarsaataassapput. Isumaqarpunga peerneqarnissaannut sapaatip akunnerinnaanik periarfissiisoqartariaqaraluartoq. Umiarsualivimmi quersuaqarfiu eqqaaniittut containerit allamut nuunneqarnissaat pisariaqarluinnaraluarpoq, takornariammi umiarsuarnik tikittartut illoqarfimmut appakaatileraangamik takoqqaartagaasa ilagaat. Peeriarlugit nunaminertaa qalleriarlugu sanalukkanik tuniniaasartut allallu "niuertarfigisinnaagaluarpaat" saniatigullu Havnefest-ertoqarnerani arlaannut atorluarneqarsinnaagaluarpoq.

Una illukoq ukiut arlilerpai inoqarani napaannalerlunilu. Atoqqinneqarnissaanik pilersaaruteqartoqarpasinngimmat piaarnerpaamik peertariaqaraluarpoq.

Taseraliup tungaanut aqqusinniaq naammasseriikatammat aqqusinniornermi siorartakut ujarattakullu sinneruttut ingerlaannaq piiarneqarsimasariaqaraluarput, taamatut qimaannagaallutik kusassaataanngivikkamik.

Malunnarpoq atorfissaqartitsisoqaleraangami aallerfigiinnarneqartartut. Soormi piipallaannarunik?

Illoqarfipput ukiumi siorarterneqakkajuppoq, ajoraluartumilli sioqqat ukiuni arlaqalersuni qaleriiaaginnartut kusassaataanngivipput. Sioraajaasarnissaq illoqarfitta aqutsisoqarfianiit soqutigineqarnerusariaqaraluarpoq.

Aamanna eqqartuussiviup saneraani saavanilu nunataq qorsooqqinniartussaagaluartoq, sioqqalli ukiuni arlalinni qaleriiaaginnarsimanerisa nunataq kusarnartinngiivippaat.

Umiarsualiviup tungaanut aqquserngup sangoriaani sioqqanut katersuuffinngorsimasoq qalliinnarneqarsinnaagaluarpoq taamalu pujoralammik pilersitsisarnersua pinaveersimatilerlugu.

Brugseneeqqap illoqarfiup qeqqaniittup saqqaani nunataq siornatigut ivikkanik naasartussanngorlugu suliaagaluarpoq, sioqqalli ukiuni tulleriiaani qaleriiaaginnartartut isumagineqarnerlu ajortut pissutigalugit nunataaniaraluartoq kusanaallisimavoq iluarsartariaqarlunilu.