Unittarfiit / Uninngasarfiit

Illoqarfitsinni biilinut unittarfiit (parkeringspladser) ajoraluartumik arlaqaalupput naammassineqanngitsuusamik suliarineqartartut. Naluara asfalterisoqarnissaagaluanik kommunemiit sipaarniartoqartarnersoq imaluunniit atuisup nammineq asfaltilersortinnissaq isumagisassarineraa. Nammineq isumagisassaasimappat pissutsit takutippaat atuisup asfaltilersuinissaq sipaarfiginiarlugu unittarfiit sioqqanik qalleqqaannarnissaat pingaarnerutittarsimagaa, tamannalu allanngortittariaqaraluarpoq.

Amerdlok' assigiinngitsunut atorneqartarami taassuma tungaanut aqqut eqqaalu tamarmi asfalterneqartariaqaraluarpoq.

Brugseneeraq Kussangasup tungaaniittoq naammassineqaramili eqqaata uninngaartarfia asfalterneqarsimasariaqaraluarpoq, pingaartumik sangoriakasia asfalteqannginnami upernarnerit tamaasa aseruatiterluni biilinut aserorsaataasarunaqaaq. Panernarsigaangat pujoralannartaqaaq, pujoralallu pinngitsoorani pisiniarfeeqqap iluanut ingerlasarpoq nioqqutissanut pilerinarsaataanngilluinnartumik. Brugseneeqqap allilerneqaqqammersup naammassinerani biilinut unittarfia aasit naammaginanngitsumik naammassineqarpoq, unittarfimmi tamakkerlugu nutaamik qallersimasariaqaraluarpoq.

Fritidshjemmep nutaap isaariaata silataani unittarfik aamma naammassillugu qallerneqarsimasariaqaraluarpoq.

Minngortuunnguup Atuarfiata saqqaa sioraannaasoq tamaat qallerneqaannarsinnaagaluarpoq, timersortarfimmimi aaqqissuussisoqartillugu biilerpassuit tamaanga inississortarput. Qallerneqaruni aamma aasaanerani pujoralannanngitsumik marked-ertarfittut atorluarneqalersinnaagaluarpoq.

Timersortarfiup isaariaata tungaanut aqqut silissineqaruni iluaallassagaluaqaaq. Qaarsortamineq peeriarlugu isaariap tungaanut aqqut silissineqarsinnaagaluarpoq taamaalilluni periarfittunerulissagaluarami.

Høka saavani unittarfik qallerneqaruni pujoralannarunnaassagaluarpoq aammalu atisaarniarfiup silatini nammineq aasaanerani atorlualersinnaagaluarpaa soorlu silagitsillugu nioqqutini silamiitillugit imaluunniit atorneqanngikkaangat innuttaasut namminneq arlaannut atorsinnaallugu.

Inissiaatileqatigiiffiup INIp biilinut unittarfii illugiillugit qallerneqarunik aamma pujoralannarunnaassagaluarpoq.

Meeqqerivik naluttarfiup eqqaaniittoq naammassineqaraluarpormi, isumaqarpungali suli naammassivinneqanngitsoq. Eqqaani biilinut unittarfiliaq aasiit asfalternagu qimaannarneqarpoq isaariaalu nerukitsoralammik pularialiinnarneqarluni. Tamarmi qallerneqarli kusanarnerusumillu ilusilerlugu.

Quersuup sinaani KNI-miut biilisa unittarfiat nutaamik ilusilerluariarlugu asfalterneqaruni aamma iluaallassagaluaqaaq.

Piareersarfiup silataa unittarfialu aamma suli naammassineqanngitsutut taasariaqarpoq. Paasiuminaattaqaarlu Sisimiuni sanaartortoqaraangat sanaartukkap silataa eqqaalu kusanartumik naammassineqarneq ajormata.

Pisiffik nutarterneqarpoq, sanaartukkallu naammassineqaraangata silataasa eqqaasalu suliarineqanngittarnerannut taanna aamma uppernarsaataaginnarpoq. Unittarfia annertunngeqisoq kusanaappallaarujussuarmik ilusilerlugu aasiit qimaannarneqarpoq.

Pisiniarfik tikikkiartorlugu unittarfia isigiuminaaqaaq unittarfiunissaminullu naleqqutinngilluinnarluni.

Kiisamilimi nunatsinni unittarfiliat kusanaannersaattut taarusunnarnerugaluarpoq tassali qanillillugu kusanaaruttormat.

Nuannaarniartarfiup Pub Raajap silataa ukiorpassuanngortuni sioraannaasoq asfaltimik imaluunniit cement blok-kinik qallerneqaruni illoqarfitsinni ornigarneqarluartartup eqqaani takujuminarninngussagaluaqaaq.

Spar Quick Qiviarfiup eqqaaniittoq aamma takussutissaavoq sanaartorfiit tamakkiisumik naammassineqaratik qimaannarneqartarnerannut, pisiniarfimmi naammassineqarami eqqaa tamarmi qallerneqarsimasariaqaraluarpoq sioraannaajunnaalluni.

Spar Quick Qiviarfik qulaaniit isigalugu. Aasami panernarsigaangat biilit isaariap eqqaanut unittarput taamalu pujoralassuaq pisiniarfiup iluanut isaasarpoq, matuimi ammaannartarmata. Nerisassaarniarfiummat eqqarsaatigineqartariaqarpoq.

Meeqqeriviup Aajup silataa asfalterlugu qallerneqartariaqarpoq ulluinnarnimi meeqqat aggiunneqaraangamik aaneqaraangamilluunniit amerlasuutigut biilit silataanut unittarput. Qallerneqannginnami malugineqarsinnaavoq aqqutaata ilaa koorusaarfigineqartuarluni "kuunnguaqalersimasoq".