Asfalt-imik qallertariaqartut

Illoqarfitsinni angallaffiit uninngasarfiillu sioraannarnik qallersimasut arlalissuupput. Tamakkua aasaanerani panernartillugu pujoralannartorsuusarmata asfalt-imik imaluunniit pisariaqaraangat cement blok-kinik qallerneqarunik illoqarfiup pujoralannartarnera qaangerneqassagaluarpoq.

Orsersortarfiup eqqaa sioraannaagami panernartillugu pujoralannartaqaaq qallerneqartariaqarlunilu.

Orsersortarfimmut pulariaaniit qallerneqaruni iluaallattorujussuussagaluarpoq. Orsersortarfimmut pulariaata nalaani kalaalimerngit ballenut iliinnarlugit tuniniarneqartarmata tamanna panernarnerani pujoralannartillugu tuniniaavissaqqinngitsorujussuuvoq, tuniniarneqartummi nerisassaapput.

Sissami pølsebarip eqqaa tamarluinnarmi aamma qallertariaqarpoq, biilimmi unikkaangata pujoralannikkaaqaaq, pølsebarillu igalaavi ammaannartaramik pujoralak isaasarunaqaaq. Aali nerisassanik pisiniarfigisaripput.

Kolligiet saavatungaat aqqusinnniarineqarniarsimagunaraluarpoq naammassineqarsimanngitsorli takuneqarsinnaavoq. Aqqusinniariniarneqanngippat soormi qalleriarlugu uninngaartarfittut atorneqaruni.

Timersortarfiup saneraani qummukajaannguaq angallaffiunngikkaluarpoq, timersortarfilli orserneqassatillugu tankersuit majuarfissaat maneeqaaq, taamaammallu qallerneqaruni isumannaannerulissagaluarpoq.

Brugsenip anginerup tunuanut isaariaq panernartumi pujoralannartaqaaq qallerneqartariaqarlunilu.

Aqqusinersuarmi blok 15-ip sinaa asfaltilerneqarsinnaagaluarpoq imaluunniit naggorissunngorlugu nunagissarneqarsinnaalluni, taamaalillunimi takujuminarnerulissagaluarpoq.