Nunatat uninngaarujoortarfiit (Park-it)

Illoqarfitsinni arlalissuarnik nunataqarpoq qaarsortaqannginnertik pissutigalugu sanaartorfigineqarsinnaanngitsunik. Nunatat ilaat annertuujupput ilaallu annikinnerullutik ukiorpassuarnilu annerusumik kusassagaanatik atorluarneqaratillu.

Ataani assilisatigut paasinarsisikkusuppara nunatat tamakku nunagissarnerisigut, ilusilersornerisigut kusassarnerisigullu park-itut atorneqalersinnaagaluartut, taamaalilluni aasaanerani - aammami ukiuunerani - silagissiorujoortarfittut atorneqarsinnaalissagaluarmata, soorlu aaqqissuussisarnertigut katersuuffigineqartarsinnaallutik.

Allakkeriviup eqqaaniit kujammut meeqqerivik Naalu-p tungaanut tassanngaanniillu kimmut INI-p qullersaqarfiata tungaanut nunataq narsartarujussuaq narlorsarlugu pisuttarfiliortiterlulugu nunagissarneqaruni kusatsissinnaaqaaq taamaalillunilu park-erujussuartut atulersinnaalluni. Narsartarujussuaq INI-p qullersaqarfiata tungaaniit kangimut isikkivia. Nunatarujussuaq narlorsaruni annertoorujussuuvoq atorluarneqalersinnaasoq.

Nunatarujussuaq atuarfiup tungaaniit kimmut isigalugu, saamiatungaaniippoq meeqqerivik Naalu saamiatungaaniillunilu meeqqerivik Kanaartaq, meeqqeriviillu taakku akornanni narsartarujussuaq park-iliassaqqeqaaq.

Narsartaq aqquserngup sinaaniit kimmut kolligiet, kommunep allaffiata kiisalu INI-p qullersaqarfiata tungaanut kimmut isikkivia. Nunataq ujaraagassaavoq torersagassaallunilu. Narlorsarneqarunili pisuttarfiliortiteriarlugulu nunataa ilusilersorlugu park-iliassaqqilluinnartuuvoq.

Naluttarfiup tungaaniit avannamut allakkeriveqarfiup tungaanut narsartarujussuaq aamma qaarsortaqarpiannginnami sanaartorfigineqarsinnaanngilaq. Nunataq atorluartariaqarpoq narlorsarlugu, kuuffeqarnera iluarsaateriarlugu pisuttarfilersorlugu. Aamma periarfissaasinnaagaluarpoq arsaattarfeeraliarissallugu, narlorsariarlugu nutaamik ivigai naatillugit, taamaalilluni tamaani ivigaaralimmik arsaattarfeqarsinnaagaluarpoq.

Naluttarfiup allakkeriveqarfiullu eqqaa kitaatungaaniit kangimut isigalugu.

Brugseneeqqap illoqarfiup qiterpasissuaniittup eqqaani nunatamineq siornatigut ivikkanik naasussanngorlugu suliaagaluarpoq, maannakkulli sioqqanik qaleriiaaginnaqqasunik ulikkaarpoq ukiukkut siorarterutit peeqqinneqarneq ajoramik. Sioraajariarlugu nunagissaqqikkuni kusatsissagaluaqaaq.

Aajuna Nasiffiup qaavani takornarianut takusassiaq, qaasuitsup killingata avannaatungaaniinnermik nalunaaqutsiisoq.

Nasiffiup qaavani nunaminertaq cement blok-kinik imaluunniit asfaltimik qallerneqaruni takornarianut innuttaasunullu ornikkuminartunngortinneqarsinnaagaluarpoq, tamaanngaanniimmi kujammut, kimmut avannamullu isikkivik kusanartorsuaq takuneqarsinnaavoq.

Nalunnguarfiup Atuarfiata avannamut avataatungaa nunagissarlugu ivigaqalertussanngorlugulu kusassarneqaruni najoruminartunngortinneqarsinnaasut ilagaat.

Peqqissaaviup saqqaani narsartarsuaq nunagissagassaqqissut ilagaat. Aasaanerani innuttaasut sukujuutiminnik tuniniaavigilluartalermassuk takujuminarsarneqartariaqarpoq.

Narsartaq tamanna nunagissaqqillugu ivigarissilluarsinnaavoq. Nutaamik pisuttarfippalaarnerusumik aqqutilerneqarsinnaavoq ivigaqarfittaalu uninngaartarfilersorneqarsinnaalluni, taamaalilluni aasami ulluni silagissiorfinni atorluarneqarsinnaagami.

Narsartaq aqquserngup sinaa tamanna narlorsarlugu pujoralannarunnaarlugu cement blok-kinillu qallerneqaruni tuniniaavigineqartarnermini ornikkuminarnerulissagaluaqaaq.

GTO-pladsitoqaasimasoq narlorsarluarlugu asfaltimik qallerneqaruni aasaanerani ukiuuneranilu aaqqissuussinernut assigiinngitsunut atorluarneqarnerulissagaluarpoq.

GTO-pladsitoqaasimasoq sioraannaagami pujoralannartaqaaq takujuminarpallaaranilu.

GTO-pladsitoqaasimasup kangimut akiatungaani nunataq iluarsaateqqillugu issiavissalersorlugulu aasaanerani uninngaarujoortarfiliassaqqissuuvoq, pisuttarfiit pisuttarfippalaarnerusunngorlugit.

Nuna naggorilluartartoq kusassaqqinneqaruni takujuminarsaataassagaluaqaaq.