Inuiattut ullorsiornermi oqaatsigut

Namminersornerup atuutsinneqalerneraniit ukioq ataaseq qaangiuppoq, Nunattalu inui namminersortutut siullermeerlutik ullorsiorput. Ullorsiortarnerput amerlanerujartuinnartut ataqqillugu peqataaffigisarpaat, nuannaarlutik, tulluusimaarlutik pingaartitsillutillu. Inuiassuimmi allat aamma taamaapput, inuiaassusertik pingaartittaqaat, Nunatsinnilu allaanerunngilaq.

Nunarsuatsinni inuiannguit ikinnerussuteqartut naalagaaffimmiillu allamit sunnersimaneqarnertik pissutigalugu nunaminni oqaatsiminnik annaasaqarsimasut eqqaagaangakkit, tulluusimaarlunga nuannaarutigisaqaara uagut oqaatsigut ullumimut attattuaratsigit, naak danskit sunnersimanerugallarmatigut oqaatsigut sanngiilliartorsimagaluartut.

Inuiaat allat oqaasiinik Nunatta inuisa ilikkagaqarnissaminnut tunuarsimaanngilluinnarnissaat pingaarteqaara, nunarsuummi sinneranut attaveqarnerput nukittorsartuartariaqarparput, nukittorsaanermilu oqaatsit pingaaruteqarnerpaapput, ingammik allamiut oqaasiinik atuisinnaalluta attaveqarsinnaagutta.

Namminersortuunissamik immitsinnut akisussaaffilereeratta oqaatsitta nukittoriartuinnarnissaat ulluinnarni sulissutigiuartariaqarparput, oqaatsinik atuilluartuusariaqarluta, naqqissuisinnaalluta, meeqqanik ilinniartitsilluta, suliartortitanut ilinniartitserusulluta, oqaatsinut sumiorpaluutinullu ataqqinnilluta eqeersimaarlutalu.

Namminersorneq angereeratsigu tulluartuuginnassaaq ullorsiornitsinni oqaatsigut malunnaatilimmik inissikkutsigit, oqarluta: Ullorsiornermi aaqqissuussinerni tamani oqaatsigut kisimik atorneqartassasut, nutserinerit atorneqaratik. Oqalugiartoqarpat, nersornaasiisoqarpat allamilluunniit pisoqarpat, taava oqaatsigut kisimik atorneqassapput, nutserinerit atorneqaratik.

Immikkoorniarnerunngilaq, allamiunik immikkoortitsiniarnerunngilaq ingasattajaarniarnerunanilu. Paarlattuanik imminut tulluusimaarutigineruvoq, imminut tatigineruvoq, nunagisamut oqaatsinullu asanninneruvoq.

Ullorsiornitsinni inuiaassuserput, nammineq oqaaseqartuunerput kinaassuseqarnerpullu oqaatsitsigut malunnartikkutsigit allanik ataqqinninnginnermik takutitsinerunngilaq, inuiaassusermilli naqissusiinerulluni. Tassuuna takutissavarput inuiaasugut imminut ataqqisut, imminut tatigisut, sulerusuttut, siuariartorusuttut, nunarpullu unammillernarluinnartoq inuuffigissallugu ajukkutsinngitsut.

Danskit ukiorpassuarni Nunatsinni najugaqartut, Nunatsinnut inuinullu isiginnittaasiat takusarpakka tusaasarlugillu, nuannersuinnaasanngikkaluartullu amerlasuut Nunatsinnut inuinullu ataqqinnillutik siuarsaaqataarusullutillu inooqataapput.

Danskilli inuusunnerusut, kinguaariinnit pisoqaanerusunit allarluinnarmik isiginnittaaseqartut ullumikkut Nunatsinniilersimapput. Naapittarakkit oqaloqatigisarlugit, ilisarisimalluagaqarlungalu, ilaasa paasiuminaatsittarpaat sooq suut tamarmik nutsigaasariaqarnersut, minnerunngitsumillu sooq allamiut oqaasii - soorlu namminneq oqaatsitik - Nunatsinni taama pingaartigisutut isigineqarnersut. Naapittarpakka danskit inuusuttut oqaatsitsinnik ilikkarusuttut, Nunatsinni kulturimut akulerusimallutik inoorusuttut, Nunattalu inuinut ataqqinnittut asannittullu. Isiginnittaatsimik misigisarsimasannit allarluinnarmik isiginnittaatsimik takutitsisartut, uanga inuiaqatimalu siuariartornissaannut peqataarusuttut.

Ullumi danskinit arlalinnguanit assammillunga pilluaqquneqarpunga, tamarmillu uagut oqartarnitsitut oqarput: Pilluarit!

Nalunngilaat inuiattut ullorigipput, nalunngilaat inuiaassuserput ataqqigipput, nalunngilaat imminut tatigisunik nunarput inoqartoq, nalunngilaallu oqaatsigut pingaartittarigut.

Ukiut 25-t qaangiupput inuiattut ullorsioqqaaratta, ajoqutaassanngeqaarlu ukiuni tulliuttuni sinnerini ullorsiortarnissatsinni oqaatsigut pingaarnerutillugit ersersittarutsigit.

Pilluarit!