Atuarfimmi atuartuuteqarneq

Atuartut naammaginanngitsumik angusaqarnerarlugit meeqqat atuarfiinit qimaguttarnerat isummersorfigineqartuarpoq, qujanartumimmi aaqqeerusussuseq piumassuseqarfigineqarpoq. Tamattami qitornaqanngikkaluaruttaluunniit Nunatsinni atuartuusarnerup angusaqarfiulluartumik naammassineqartarnissaa soqutigisariaqarparput.

Ullumikkut atuarfeqarnermi suut ajornartorsiutaanersut allaatiginianngilakka, isumaqarpungami angajoqqaatut atuartuuteqartarnermi akisussaaffiup sukumiisumik oqallisigineqarlunilu isummersorfigilluarneqarnissaa tunngaviusariaqartoq, meeqqap atuarfimmiilersup ingerlalluarnissaanut angajoqqaat / angajoqqaaq tassaammata angusaqarluarnissamut tunngavileeqataasussat.

Atuartuuteqarneq / atuarfeqarneq pillugu isiginnittaaserput inuiaqatigiittut tamatta malinnaaffigalugu oqallisigalugulu isummersorfigisariaqarparput, isumaqarama inuiaat tamarmik malinnaaffigisaannik oqallinneq isummersornerlu atuarfeqarnerup nukittuumik tunngavilerniarnissaanut aqqutaasariaqartut. Oqallinneq / isummersorneq aaqqissuussamik ingerlanneqartariaqarpoq, ilinniartitaanerup aqunneqarfianiit angajoqqaat atuartuuteqartut angerlarsimaffiat angullugu.

Angajoqqaat, atuarfimmi aqutsisut, ilinniartitsisut, atuarfimmi siulersuisut, politikerit allallumi atuarfimmut attuumassuteqarsinnaasut oqallinnermi isummersornermilu eqiingasumik peqataatinneqartariaqarput, Nunatsinni atuarfeqarnerup aaqqissugaanera, tunngavia, siunertaa ataatsimoorfiunissaalu nukittuumik ingerlalersinnaaqqullugu.

Oqallinnerup / isummersornerup tamanit malinnaaffigineqarnissaa angusinnaajumallugu radio, tv, internet, aviisit tusagassiortullu suleqatigilluinnarlugit pilersaarusiukkamik ingerlanneqarsinnaasariaqarpoq, taakku malinnaatitsinissamut periarfissatsialaammata, nunattalu inui isorartuumi siammarsimasut taakkunatigut anguneqarluarsinnaammata.

Oqallinnerup / isummersornerup siunertarisariaqarpaa meeqqap atuartuunermini sapinngisamik ukiut taakku tamaasa ilinniartitaanermigut angusaqarluarnissaa qanoq suleriaaseqarnikkut anguneqarsinnaanersoq, angajoqqaat atuarfillu nukittuumik qanoq suleqatigiilluarsinnaanersut, atuaqatigiit ataatsimoorluartut qanoq pilersinneqarsinnaanersut, minnerunngitsumillu atuarfeqarneq pillugu angajoqqaat qitornaallu qanoq isiginnittaaseqarsinnaanersut.

Nunarput namminersortunngoreermat qularnaateqanngitsumik Nunatta inuisa ilinniarluarsimasuunissaat suli annertunerusumik piumasaqaataalerpoq. Ilinniarluarsimasuunissamut meeqqat atuarfiata tunngavileeqataanissaa pingaaruteqarnerpaavoq, piumasaqaatinullu annertunerujartuinnartunut atuarfik tunngavileeqataalluartuussappat, atuarfik tassaalersittariaqarparput inuiaqatigiit tunngaviliisuisa pingaarnerpaat ilaat. Atuarfeqarneq tassaasariaqarpoq inuiaqatigiinni ataqqisaasumik inissisimasoq, inuiaqatigiinni kinguariit siuariartuinnarnissaannut tunngaviliisussatut isigineqartariaqartoq.

Nunatsinni inuit ikittunnguugatta atorfissaqartut tamarmik inissaqartariaqarput. Angajoqqaarpassuaqarpoq ilinniarsimanngitsunik, aamma angajoqqaanngujaarsimasunik. Taama inissisimasut ilinniarsimassutsikkut inuiaqatigiinni kinguarsimanerusutut inissisimalertarnerat ataatsimoorluta qaangerniagassatta ilagaat. Imaattariaqanngilarmi; angajoqqaat ilinniarsimanngitsuummata taakku qitornaat aamma ilinniagaqanngitsuussasut. Kikkut tamarmik qanorluunniit inissisimagaluarpata atuarfik nukittuumik inissisimasoq aqqutigalugu meeqqat qanorluunniit inissisimasut ilinniarluarsimasunngornissaannut periarfissaqartittariaqarpagut.

Maanna atuartuuteqartunut aammalu qaquguluunniit angajoqqaanngorumaartunut atuartuuteqalerumaartunullu tamanut kaammattuutigerusunnarpoq atuarfeqarnermut isiginnittaaseqarneq aalajangersimalluinnartuusariaqartoq. Angajoqqaajugaanni angajoqqaanngorniaraannilu ilisimasariaqarpoq meeqqat atuarfianniititaqarneq akisussaaffiummat meeqqamut angajoqqaavinullu piumasaqarfiusoq.

Atuartuuteqaleqqaarnermiit naammassinissaata tungaanut meeqqap atuarfimmi ingerlanera ullut atuarfiusut tamarluinnaasa malittariuartariaqarpoq, ilinniartitsissutigineqartut malinnaavigalugit, meeraq piffissaqarfigalugu, atuakkat angusallu malinnaavigalugit, meeqqap oqaloqatigiuarnissaa piffissaqarfigalugu, ilinniartitsisui attavigiuarlugit, atuarfik pisariaqartutigut attavigiuarlugu minnerunngitsumillu meeraq atuarfimmi toqqissisimanersoq alaatsinaattuarlugu.

Atuartuuteqarneq angajoqqaat ulluinnarni 'suliffittut' pisussaaffigalugu oqaloqatigiissutigisariaqarpaat, meeqqap angerlarsimaffimmi ilinniagassatigut tapersersornissaanut suleqatigiittarlutik. Suleqatigiittarneq iluatsittuaannassappat meeqqamut tapersersuinermut periaatsit angajoqqaat oqaloqatigiissutigiuartariaqarpaat, meeqqammi soqutiginninnerata milliartunnginnissaa qulakkeertuartariaqarpoq.

Atuarfimmut aalajangersimalluinnartumik isiginnittaaseqalernitsigut Nunatsinni ilinniartitaanerup siunnerfeqartumik tunngaveqarnissaa qulakkeerniartariaqarparput. Isiginnittaatsip tamatuma meeqqat, angajoqqaat ilinniartitsisullu atuarfik ataatsimoorfigissavaat ilisimalluarlugulu atuarfik qanoq siunertaqarnersoq, sunik siunnerfeqarnersoq ulluinnarnilu periaatsit qanoq malittarisassaqarnersut. Isiginnittaatsip tamatuma atuarfik nukittooq pilersissinnaappagu, qularnanngilaq meeqqanik atuartitsineq ilinniartitsinerlu nukittooq tunngavileriartuaarneqarsinnaasoq.