Pissangagisamut pakatsineq

Filmi "Eksperimentet" suliarineqartussanngortoq tusaqqaarakku imminut oqarfigaanga: "Takusariaqarpara!".

Tine Bryldip atuakkiai soqutigalugit atuartarsimagakkit takorloorpara, filmi suliarineqaruni qularnanngitsumik isiginnaartumut tiguartinnartumik suliarineqassasoq, Tinemmi allaaserisartagai Nunatsinnut tunngasut oqimaattaraluaqisut oqaluttuarisaanitsinnik ersersitsisarmata ilimasussimavunga paatsuugassaanngitsumik paasinartumillu kalaaliaqqat oqaluttuarineqartut filimimi takutinneqarumaartut.

Pakatsivungali pisimasut ilaannakorujussuartumik takutinneqarmata. Meeqqat angerlarsimaffianni aqutsisuusimasoq sammineqarneruvoq, isumaga malillugu meeqqat pineqartut sukumiinerusumik sammineqaratik. Nalunngilara, soorunami meeqqat aallaaviupput, kisiannili atuakkiortup inunnik pineqartunik oqaluttuartitsinera aallaavigissagaanni, taakku namminneq misigisimasaat flimimi sammineqarnerusinnaagaluarput.

Filmi qallunaatut oqaluttunik aallaaveqarmat isornartoqartinngilara, taakkumiuku nammineq suliartik oqaluttuarigaat, ajunngilaq. Pakatseqaangali filmip uagut oqaatsitsinnut allagartalersorneqarnera suliarilluagaanngitsoq takusinnaagakku. Nutseripalaaginnarnerunerpoq imaluuniit? Ingammik allagartalersornera atuarlugit kukkunersuarnik naammattuugassaqarfiujuarpoq, ajoraluartumik allagartalersornerani allattuusoq pimoorussisimanngitsutut taasariaqarluni.

Nalilersuisartutut misilittagaqanngikkaluaqalunga, filmi pitsaassusilissagukku ullorissanit tallimaniit ataasinnarmik tunivara.