Aningaasat sulissapput

Inatsisartut ataatsimiinnerat oqaaserpassuarnik tusarniitsunik nassataqarsimasoq naammassivoq. Naalakkersuisuutitaqartut inuiaqatigiinni allannguiniarnermik ilungersuutitik maanna piviusunngortikkaluttualerpaat aningaasanut inatsit akuerigamikku.

Nunap aningaasivia sinneqartoortussanngorlugu akuersissutaammat ajunngikkaluaqaaq, sulili apeqquterujussuuvoq sinneqartoortitsiniarneq innuttaasut aningaasaatikinnerpaat suli aningaasaatikinnerulernerannik nassataqassanersoq.

Inatsisip malitsigisaanik Nunarput aningaasarsiornerulernissaminut periarfissinneqarnersoq suli takujuminaatsorujussuummat inatsimmut akuersisunut ukiut tulliuttut unammillernartorujussuussasut siulittuinnarneqarsinnaavoq.

Nunattami nammineq aningaasarsiornerulernissaanut inatsimmi aqqutissiuisoqarnersoq suli ersernerluppoq. Avammut niuerutissanik siuarsaanissamut aningaasaliisoqanngilaq, tamatumalu nassatariinnartussaavaa suliffissaqannginnerup suli attattuarneqarnera.

Naalakkersuisut inuussutissarsiornikkut siuarsaanissamik qineqqusaaruteqarsimanerat piviusunngussappat, Nunatta avammut niuerutigisinnaasai pinngortinniarlugit politikerit ilungersoqataanerusariaqarput. Misissorlugu pisuussutit imarmiippata nunamiippataluunniit qanoq aningaasarsiutaasinnaanersut aqqutissiueqataaffigalugu, inuussutissarsiutinik ingerlatsisut suleqatigilluinnarlugit.

Imarmiut nunap aningaasivianut aningaasarsiutaasinnaanerat killeqareeqimmata, misissorluartariaqarpoq qanoq iliornikkut aningaasat Nunatsinni kaaviiaarnerulersillugit sulisinneqarsinnaanersut, aningaasammiuku sulisitassat.

Suliffissuarnik ingerlatsinerit akilerpiarsinnaanngitsut paasereerpagut, tunisassiammi iluanaarutissaannit akisunerusumik aningaasartuuteqartarneq imminut akilersinnaanngilaq. Suliffiilli mikinerutillugit niuerutissanik tunisassiorneq akilersinnaanerunersoq aqqutissaanersorlu misissorsinnaasariaqarparput, imaassinnaavormi imarmiut pisassiissutaasartut amerlassusiannut naapertuussarlutik nunami inuussutissarsiutaasinnaasut. Imarmiunillumi qalluisussat amigaataanngillat.

Misissuinngikkaannili paasinavianngilagut. Ilissi politikerit tamakkuninnga misissuinissamut periarfissaqarpusi aqqutissiueqataasinnaallusilu. Illoqarfiit nunaqarfiillu inui ornillugit oqaloqatigalugillu periarfissanik periarfissaanngitsunillu oqaloqatigalugit misissuiniaritsi, qularnanngilaq imminut akilersinnaasumik niuerutigissallugillu ingerlanneqarsinnaasunik nassaassaqarsinnaasoq.