Politik angussuaasaarfiginagu!

Aviisi AG misissuataarlugu atuarpara, aningaasaqarnermut naalakkersuisorput facebookimi allagaqarsimasoq issuarneqartoq, EU-mi ataatsimeeqateqarnissani qilanaaralugu qaffasissuminngooq oqallisissagamik. Qaffasissumik allassimagami assersuutigisimavaa, Nunatsinni oqalliseriaaseq appassissorooq Siumukkunniik ingerlanneqartoq qimalaassagamiuk.

Eqqarsaannarpungami: Inuk taamak inuiaqatigiinni akisussaaffeqartitaalluni atorfeqartitaasoq angussuaasaalersimaguni aappaatigut tupigisariaqanngilaq, oqaatsigummi atorsinnaannginnamigit paasisinnaanagillu illuatungiliuttumi oqallisigisaat allatut oqaasissaqarfigeriarsinnaannginnamigit nikassaarpalaartumik pissusilerluni taama allagaqarpoq.

Pakatsinartorivaa, qinigaq taamak Nunatsinni nuimaniartigalunilu akisussaaffimmik tigummerusutsigisoq taama ikkatsigisumik nikassaarpalutsigisumillu pissusilersorluni politikereqatini nalilersorsinnaammagit.

Paasisinnaalluaraluarpara kikkut tamarmik qanorluunniit oqarsinnaatitaanerat aamma facebookimi atuuttariaqartoq tunngavilersuutigineqassappat, kusanaagiinnarparali inuit qinigaattut akisussaaffeqartitaaneq qanorluunniit oqarsinnaanissamut nikassaatiginiutigalugu atorneqarmat.

Politikerertatta akornanni nikassaaniutit taamaattut innuttaasut marlunnik oqaaseqarnerarlugit inuuffigisaanni suleqatigiinnissamut qanillisaataanngilluinnarlutik avissaarutaagaluttuinnarput naak taamatut ingerlajartulernissaq kissaatiginanngikkaluaqisoq.

Politikerinut nunamik aqutsisunut illuatungiliuttunullu eqqaamaqqunaqaaq, inuiaqatigiit pillugit oqallittarnissinni pissuserissaarnissarsi uagutsinnut qinersisartunut pingaaruteqarmat. Politik sakkortusaarfiusartoq nalunngilara, sakkortusaarnerli oqaatsinik torernerusunik atuilluni aamma ingerlanneqarsinnaavoq, oqaatiginiakkap sakkortorngata kimia katanngikkaluarlugu.