Aningaasaqarnermut naalakkersuisoq sipaarniutissanik ujartuilluni tassami sukassimavoq. Nunatta aningaasaqarnera ingerlalluaqqullugu suliniuteqarsinnaammat ajunngikkaluassusia, kisianni ...
Timmisartuunneqarnermi aningaasartuutit ikilisarsinnaajumallugit Air Iceland isumaqatigiissuteqarfiginiarlugu naalakkersuisoq saqqummiussaqaannartorli illuatungilersuisut taannaqami saqqummeralerput. Tupigikulunneqarpormi Namminersorlutik Oqartussat piginneqataaffigisaannut unammillertumik Namminersorlutik Oqartussat isumaqatigiissuteqarnialermata.
Naalakkersuisuutitaqartut siuttui IA-kkut Inatsisartuni saqqumilaarnerpaartaasa ilaat illuatungiliisunut ilannguppoq, aningaasaqarnermullu naalakkersuisup iliuusaanut illuatungiliinermigut IA-kkut takutiinnarpaat naalakkersuisooqatitillu Demokraatit, akunnerminni oqaloqatigiittarnerat killeqarsimasoq.
Naalakkersuisooqatigiit suliaasa ingerlanneqarneranni Demokraatit pissaaneqassusiat malunnarsigaluttuinnarpoq, allaammi eqqarsarnarsivorluunniit partii taanna maanna Nunatsinnik aqutsisuulersimasoq. Tupinnanngilaq nittartakkani isummersortarfinni arlalippassuarni Demokraatit aqutsisuulersimanerarlugit allattoqartarmat.
Maannamut nalilersoruminaappoq Namminersorlutik Oqartusssat sulisuisa timmisartuunneqartarnissaannik taamatut isumaqatigiissuteqarnialerneq atuisunut - akileraartartunut nalinginnaasunut - qanoq kinguneqarumaarnersoq. Air Greenlandimi aningaasaqarnerminik "uumaannarnissaminillu" aniguiniarluni ilungersoreertigisoq qularnanngilaq isertitamigut eqqugaajumaartoq.
Naalakkersuisup isumaqatigiissutiginiagaa silaannakkut angallannermi akitigut inuiaqatigiit sinnerannut sunniunnerlussappat sullissiniarneq pitsaanerulernavianngilaq, qularnanngitsumik. Aasiit akiligassaq naggataagut akileraartartunut tukkumaarpoq.
Naalakkersuisooqatigiinni siuttuuniartut tullersortiminnit aqunneqaleraluttuinnassanngikkunik malunnaateqarnerusumik sulisariaqalerput, takutissinnaasariaqarpaallu nunami maani aqutsisuullutik.
Air Greenland piginnitsimi ilaannit maanna unammillertinneqarpoq, qularnanngitsumik timmisartortitseqatigiiffiup aningaasaqarneranut sunniuteqarnerluttussamik.
Ingen kommentarer:
Send en kommentar