SUME - atuakkiaq isiginnaagassiarlu

Juullillarmat nuliannguama tunileriallaraanga SUME pillugu atuakkiaq, nipilersoqatigiit ukiuni 40-ni nipilersoqatigiittarsimanerat pillugu Peeriaqqap allagaa. Qallunaatuua pisiarisimammagu nangaaqqaaraluarpunga, qupperarluguli takoriarakku nutsigaanngitsoq ajorinngiinnarpara. Nutsikkaninguna atuarusunneq ajortunga.

Nipilersoqatigiit meeraagallaramali allarpassuartulli nuannarisakka qanoq allaatigineqarsimanersut atuassallugu qilanaarinermik ulloq unnuarlu naanngitsoq atuagaq tamannguat atuarlugu naariikatappara, ilami aamma oqaluttuassartaat soqutiginartoqaqigami.

SUME-kkut pileqqaarneranni oqaluttuassartaa paasisaqarnaqaaq, uggornartorivaali nipilersoqatigiinni ilaasarsimasut tamarmik atuakkami oqaluttuartinneqanngimmata. Oqaluttuarineqarnera isorinngilara, isumaqartungaliuna inuit nipilersornikkut Nunatsinnut taamak pingaaruteqarsimatigisut inuttaat tamarmik oqaluttuartinneqarlutik atuakkiarineqarsimagaluarunik atuaganngortinneqarnera suli soqutiginarnerusimassagaluartoq.

Tulluartuusimassagaluarpoq atuakkiortoq imaluunniit tusagassiortoq kiffaanngissuseqartitaalluni atuakkiortuusimagaluarpat. Taassuma nipilersoqatigiit inuttai tamaasa imaluunniit taakkununnga suleqataasarsimasut allatigulluunniit attuumassuteqarsimasut oqaloqatigisinnaavai taamalu oqaloqatiginninnerit oqaluttuartitsinerillu atuaganngortinneqarsinnaallutik.

Inuup ataatsip eqqaamasalersaarneranit inuit arlallit eqqaamasalersaartinneqarsimagaluarunik oqaluttuartinneqarlutillu, qularutiginngilara uanga nammineq atuartartutut atuagaq pissanganarnerujussuartut soqutiginarnerusutullu isigisimassagaluarpara. SUME-kkut oqaluttuassartaat suli tamatigoornerusoq taamaalillunga atuartartutut paasisaqarfigisinnaagaluarpara.

Atuakkiap uagut oqaatsigut atorlugit allanneqarsimanera takunngilara paasinagulu nutsigaasimanersoq. Tunissutisiara qallunaatut allataavoq malunnarlunilu nutsigaanngitsoq. Aammami allassimasoqanngilaq nutsigaanersoq. Qallunaatuunik atuartartutoqaagama malugisinnaavara qallunaajunngitsup allatarigaa, arlalitsigummi ippigisaqartarpunga. Oqaluttuarineqartut paasiuminaatsuunngikkaluartut tulluartuuginnarsimassagaluarpoq qallunaat allattarnerattut iluarsartuutilaarneqarsimagaluaruni.

Ataatsimulli isigalugu atuagaq SUME paasissutissanik assigiinngitsorpaalunnik tunniussaqarpoq, tamannalu pillugu atuakkiortuara qutsavigisariaqarpoq.

2011 naalluinnalersoq KNR TV-iikkut aallakaatinneqarpoq SUME pillugu takutitassiaq. Pissangagalugu qilanaaralugulu takunissaa utaqqisimavara, oqaatigineqarmammi aallakaatitassiaq sivisuumik suliarineqareerluni maanna takutinneqarnissaminut piareertoq. Sivisuumimmi suliaasimaguni qularnassanngimmat pitsaasumik suliaasimassasoq.

Pakatsivungali aallakaatitami SUME-kkunni nipilersoqataasarsimasuni ataasinnguarluunniit oqaloqatigineqarsimanngimmat, naatsorsuutigigaluarakkumi inuit nipilersortartutoqanngortut takussallugit. Inuit ikittuinnannguit - SUME-kkut nipilersoqatigiinngornerannut tunngaviliisuunngikkaluartut - sivisuumik nuisatittarlugit oqalutsinneqartarput, allaat aallakaatitap aallarteqqaarnerani oqalutsinneqartup SUME-kkut eqqartornerai nalunangajalluni. Aallakaatitassiami oqaluttuartinneqartut killorneqarnerat pitsaanerusimasinnaagaluarpoq, oqalutsinneqartummi ilaatigut sivisuallaamik nuisatinneqaleraangata eqqartugaallu allarujussuarmut tunngaleraangat SUME-kkut pineqarnersut nalunarsisarmat.

Aallakaatitamili alutornaqutaavoq erinnat nuannarisagut tusaqqoortuarsimasagullu akunniliunneqartarmata - naak ilaatigut assiliaq nipilu nikingasaraluartut. Aallakaatitassiamili SUME-kkut inuttaat amigaataaqaat, ilami nammineerlutik oqaluttuarsimasuugunik aallakaatitassiaq soqutiginarluinnartussaagaluarmat. Qularnanngilarmi nipilersoqatigiit inuttaat eqqartugassaaleqinavianngitsut, misigisarpassuatillu oqaluttuassaqarfigissagaluaqigaat.