Nunarujussuarput nerisassaatigullu inuussutissarsiutinngorlik!

TV-iikkut isiginnaagassiaq A taste of Greenland, uagut oqaatsitsinnik paasineqarsinnaasunngorlugu suliarineqarsimagami KNR-imilu aallakaatinneqarami alutornaqaaq. Igasoq Chris Coubrough aallakaatitassiornermillu suleqatai Nunatta nerisassaataanik takornariarfissaanillu torrallataalluinnartumik alutornartumillu isiginnaagassioramik Nunatsinni najugaqartuulluni eqqarsalersitsinngitsuunngillat.

Nunatta imartaani nunataanilu inuussutissaatai pilerinarsarlugit igasup suliarimmagit oqaluttuaralugillu, isiginnaartutut paasivara nunarujussuarput takornarianut qanoq periarfissaqartigalunilu neqeroorutissaqartigigaluartoq. Igasup oqaluttuarneratut inuussutissat pitsassuit peqqinnartullu imartatsinniit qaqinneqariaannaapput, mamarunarsarlugillu suliarineqarunik nerisassatsialassuupput takornarianut neqeroorutigissallugit ajukkunnanngilluinnartut.

Isiginnaagassiap malittarinerani Nunatta angissusersua takornariarfissaqassusialu takutinneqarmata, eqqarsalernanngitsuunngilaq Nunarput takornariartarfissuartut inerisarneqaruni innuttaasut amerlanerusut nutaamik inuussutissarsiuteqalersinnaanerannik qanoq periarfissaqartitsitigisoq. Sineriappummi annertoqigami nunallu immikkoortui allanngorartut takusassarsiorfigineqarsinnaasut amerlaqimmata, takornariartitsinermik inerisaanissaq killissaqanngiusartumik periarfissaqartitsivoq.

Nunatta allarpassuartigut inuussutissarsiorfigineqarsinnaanera ukiuni makkunani sammineqaleruttorpoq; uuliasiornissaq aatsitassarsiornissarlu assut sammineqarlutik. Qujanaqaarmi Nunarput pisuussutinik uummaatsunik peqarami, taakkumi inuussutissarsiornermi pingaaruteqartussatut maanna oqallisigineqarput, Nunattalu siunissami aningaasarsiorniarnerani isumalluutinut ilaalersimallutik.

Pisuussutinik uumaatsunik aningaasarsiornikkut iluaquteqarnissaq siunissami isumalluutinut ilaalluinnalersimagaluartut, Nunatsinni politikerinut innuttaasunullu isumaliutigeqqunaqaaq, nunami taama angitigisumi takornariartitsinermik inuussutissarsiuteqarnissaq siunissami ukiorpassuarni patajaatsumik aningaasarsiutaalersinnaammat.

Pisuussutinik piiaanermi inuussutissarsiuteqarnermilu innuttaasut tamarmik taakkunani sulisorineqarsinnaanngitsut nalunanngilaq, suliffigineqarsinnaasummi allarpassuit aamma inuttalersorniartussaavagut; inunnik sullissiviinniit inuiaqatigiinni kiffartuussiviinnut suliffissat assigiinngitsorpassuit ilinniarsimareernitsigut inuttaqartinniartussaavagut.

Takornariartitsinermik inuussutissarsiuteqarneq inerisassagutsigu ilinniartitaaneq aqqutissaavoq. Nunat allamiut oqaasiinik ilinniartitsineq aaqqissuussaasumik ineriartortissinnaalertariaqarparput, ingammik tuluit, tyskit, franskit spaniamiullu oqaasii ilinniartitsissutigineqartarnissaat aallaavigineqarunik, qularnanngilaq nunat assigiinngitsorpassuit innuttaannik Nunatsinnut takornariartitsisarnissamik neqerooruteqarsinnaanerput annertusarneqarluarsinnaavoq. Nunalli allat aamma oqaasii ilinniarfigineqarsinnaasariaqarput.

Igasoq Chris Coubrough nuannaartorinaqaaq, nerisassioriaasiami isiginnaarlugu malunnarpoq takornarianut nerisassanik pilerinarsaallaqqissuusoq. Nunarput takornariartarfittut inerisassagutsigu inuusuttut ilinniarnissaminnut pinngorsalersut aaqqissuussaalluartumik igasumut ilinniarsinnaalernissaat periarfissaalertariaqarpoq. Aaqqiissuussineq taamaattoq takornariartitsinermut naleqqussagaq ineriartortissinnaasariaqarparput.

Siunnerfigineqartariaqarpoq Nunatta inuussutissatigut takornarianut neqeroorutigisinnaasaanik ineriartortitsineq. Takorniarianut nerisassanik sassaalliineq pilerinartunngorsartariaqarpoq, imarmiut nunallu uumasuisa assigiinngitsutigut sassaalliutigineqarsinnaanerat immikkut pikkoriffigineqalernissaa anguniagaasariaqarluni. Nerisassiornermi ilisimariikkat allallu ineriartortinneqarsinnaasut igasutut ilinniartitsinermi pingaaruteqartutut inissisimatinneqalertariaqarput.

Nunarput angeqigami takornariartarfissuartut ineriartortinneqassaguni angallassisarneq isumannaatsuusariaqarpoq, takornarianillu angallassisartut suliassamminnut ilisimannilluartuunissaat pingaartinneqarluni ilinniartitsissutaasariaqarpoq. Takornariammi nunami avatangiisimigut immikkooruteqarsinnaalluartumi isumannaatsumik angallanneqarsinnaasariaqarput, isumannaallisaanerlu pingaaruteqarluinnartuusoq ilinniartitsinermi naqissuserneqartariaqarpoq.

Takornarianik oqaluttuussisartut, nerisassanik sassaalliisinnaasut aammalu takornariarfissanut angallissisinnaasut assersuuteqarfigaakka, naak qularnanngitsumik taakku ilinniartitsissutigineqarneranni ineriartortinneqarnerannilu allarpassuit aamma kalluarneqartussaasut. Assersuutigisakkali tassaasoraakka Nunatsinnut takornariartitsisarnerup inuussutissarsiutitut patajaatsumik ineriartornissaanut aningaasarsiutigineqarsinnaaneranullu alloriarfigisassat pingaaruteqarluinnartut ilaat.

2010-p aasaani umiarsuaq takornariartaat - sunaaffa tysklandimeersoq - 100-likkaanik ilaasoqarluni Sisimiunut tikimmat ilaasorpassui illoqarfitsinni angallattut assiliiffigerujoorpakka. Illoqarfiup nutaanngitsortaaniillunga taakku ilaat aappariit uniffigaannga. Aperinialermannga eqqarsaqqaaraluarpunga: Qanormi akissaanga? Isumalioramami tyskiusut, sunaaffaaku qallunaat.

Sisimiuni najugaqarnersunga uiata apeqqutigeriarlugu assigiinngitsualunnik aperillattaalerpoq. Illoqarfimmi takusassarsiorfigineqarsinnaasut pillugit aperimmat, oqarfigaara ikani - illu takornarianut saaffiginnittarfik tikkuarlugu - illoqarfiup assinganik angalaarfissanik innersuussisumik allanillu paasissutissanik pissarsisinnaasoq, immaqalu tammaviutsussarsiassanik (souvenirs) pisisinnaasut.

Oqarfigivaangali illoqarfik takornariarlugu angalaassagunik tamaani nunaqavissumiik angallanneqarnissartik oqaluttuunneqarnissartillu orniginerugaluarlugu. Makkumigooq - takornariarpassuit angallattut tikkuarlugit - aamma nunaqavissuniit takornariartinneqarnissartik kissaatiginerugaluarpaat. Paatsuugassaanngitsumik oqaatigivaa, nuna takornariagartik pillugu paasisaqarnerussagunik tamaani nunaqavissumiik takornariartinneqartariaqarlutik, nunanimigooq allarpassuarni takornariartarsimasaminni taamaappoq.

Paasilluarsinnaagakku utoqqatsissutissarsiunngilanga, aammami tupaallatsippaanga oqarami, ikani takornariat saaffiginnittarfianni sulisut kalaalertaqanngimmataluunniit pakatsinarnerarlugu. Tammaviutsussarsiassaataallu amerlanerit tassaaginnarnerarpai postkortit illoqarfitsinneersunik assitallit, nunarsuarmi takornariarfimmi sumiikkaanniluunniit aamma pissarsiarineqarsinnaasut.

Neriniartarfinnik kalaallit nerisassaataannik sassaallertartumik illoqarfik peqarnersoq apeqqutigimmagu qimaaginnarusukkaluarpungaluunniit, innersuussinnaasaqanngilangami. Innersuussinnaasakka tamarmik immikkut kalaallit nerisassaataannik sassaallertartuunngillat, nalinginnaasumik europamiut nerisassioriaasiat maliinnarlugu nerisassiortarmata. Paasilluarpara, oqarneratummi 'grønlandske specialiteter' assut misilikkusukkaluaramikkit.

Nunatsinnut takornariartartut amerliartuinnarunarmata takornariartitsinerup inerisarnissaanut uagut nunaqavissuusugut pingaaruteqarluinnartuuvugut, takornariammi nunami tikitaminni nunaqavissut naapikkusunneruvaat takornariartitsisoralugillu. Pingaartumik nunap tikitamik nerisassatigut sassaalliutigisinnaasai misilitaqarfigissallugit pingaartittagaasa ilagilluinnarpaat, takornariartarpummi nerisassanik namminneq ulluinnarni ilisimasaminnit nerisartakkaminniillu allaanerusunik takorusullutik usseerusullutillu.