Aviisi partiinut illersuisoq

Aviisi Sermitsiaq 2009 tikillugu Nunatsinni politikkikkut aqutsinermi sunut tamanut arajutsinianngitsoq, uparuaassagaangamilu tunuarsimaanngittaqisoq 2009-mi qinersinerup kingorna politikkimut malinnaanera allannguuteqarujussuarpoq.

Siornatigut allaatiginnittarnermini politikerit partiillu sulinerat amerlasoorpassuartigut sakkortuumik saqqummiussortarlugit periaaseqarsimavoq, ingammik naalakkersuisuutitaqartut sulinerannut. Tupinnanngitsumik inuit allaatigineqartut aviisimut akeqqersimaartunngortarnerannik kingunilimmik.

Nunatsinnili partiit allat aqutsisunngormata aviisi malunnartumik partiinik kikkunnik illersuisuunera uppernarsarneqarlunilusooq erserpoq. Naalakkersuisuutitaqalersut inuttaallu aviisip uparuagassaqarfigiunnaarpai allaallu suliniutaannik ajunngitsuinnarmik allaatiginnittalerluni.

Politikerit partiivisalu uparuagassartarisinnaasaannik aviisip saqqummiussuinaveersaartarnera arlaleriarluni ersertarpoq, tusagassiuteqarfiimmi allat naalakkersuisuutitaqartut suliaannut isornarsinnaasunut allaatigisartagaat tusarliuttagaallu saqqummiunneqaraangata Sermitsiap tamakku tunuarsimaarfigisarpai.

Assersuutissat kingulliit ilagaat IA-p politikkikkut oqaaseqartartuata, aningaasaqarnermut naalakkersuisup Air Icelandimut isumaqatigiissuteqarnera uparuarmagu. IA-p Inatsisartuni ilaasortaatitaata uparuaanera Sermiatsiap isiginngitsuusaarpaa, nittartakkaminiluunniit inissaqartinngilaa. Nunarput nutaanik naalakkersuisoqalermalli partiit naalakkersuisuutitaqartut akornanni aaqqiagiinnginnerit allat naammattuugassaasaraluartut, aamma taamatut aviisimit isiginngitsuusaarneqartarput.

Aviisit politikkimut upperisarsiornermulluunniit sorlermut sammmiveqassanerlutik illersuisuussanerlutillu soorunami namminneq aalajangigassaraat, nunanimi allani aviiserpassuarni tamanna nalinginnaavoq. Aviisilli taamaattut aamma allaatiginnittarnerminni nukittoqutigisarpaat inuiaqatigiinni aqutsineq isornartoqaraangat qulaajagassat tamaasa samminiarneqartarlutik. Apeqqutaatinnagu politikki illersugartik pineqarnersoq, illuatungeriilli tamaasa inissaqartillugit.

Nunatsinni tusagassiutit naqitat ikeqaat, kiffaanngissuseqarlunilu saqqummiussuisinnaaneq tamarmik periarfissiissutigineq ajorpaat. Taamaattumik aviisip uppernassusia tatiginassusialu annerpaasarpoq politikkikkut qanorluunniit tunuliaqutaqaraluaraanniluunniit aviisip illuatungeriit assigiimmik saqqummiussinnaagaangagit.