Aningaasaqarneq aningaasarsiornerlu

Ulluinnarni tamarluinnatta aningaasaq atorfissaqartipparput, ullutsinnimi inuuneq aningaasaqarani ajornaqaaq. Aningaasarsiumalluta sulisariaqarpugut, akiligassagullu akilerniarutsigit sulisariaqarpugut, inuunerpullu naammagisimaarnartumik atugaqartittassagutsigu naammattumik aningaasaateqartariaqarpugut.

Nunatta radioatigut eqqarsaatissiisartoq Nukaaraq Eugenius tusarnaarpara inuunitsinni aningaasaqartarnerput pillugu eqqarsaatissiisoq. Oqaatigisai ataatsimut eqikkaraanni kaammattuutigaa, aningaasaqarneq, aningaasarsiorneq ilami aningaasanut tunngasut suulluunniit eqqarsaatigalugit meerartatsinnut inuusuttortatsinnullu Nunatsinni ilinniartitsisalertariaqartugut.

Eqqarsaatissiissutaa isumaqatiginangaarmat assortoruminaappoq, ullutsinnimi aningaasap sumut atornissaa inuunerup qanoq ingerlanissaanut ilaatigut aalajangiisuulluinnartarmat. Isumatusaartumik aningaasaq atunngikkaanni amerlanerpaat ilikkareersimavaat aningaasaq nungukkaangami qanoq iliornissamut killiliisuutigisartoq.

Nunatsinni uagut aningaasamut isiginnittaaserput eqeersartariaqarparput, aningaaqarnerup aningaasarsiornerullu aaqqissugaaneranut ilisimasagut amerlisarlugit. Sorpassuimmi aningaasap atugaasarneranut ilisimasariaqakkat ikigisassaanngitsut ulluinnarni aningaasaqarnitsinnut sunniuteqartartut immaqa arajutsisarpagut, naak ilisimasaqarfiginissaat pingaaruteqarluinnaraluartoq.

DR-ip tv-iikkut pingasunngornikkut aallakaatittagaa PENGE danskinut aammalu danskisut paasisinnaasunut malittarisarlugu iluarunartorujussuuvoq, aningaasammi inuiaqatigiinni sulinerannut tunngasut sorpassuit tassani oqaluttuarineqartarput, isiginnaartumut tusarnaartumullu eqqarsaatissiillutik ilisimasaqalersitsillutillu.

Radiomi eqqarsaatissiisoq tapersersornaqaaq aningaasaqarneq pillugu atuarfinni sammisaqarnerulernissaq kaammattuutigimmagu. Atuarfiulli saniatigut aamma kaammattuutigerusunnaqaaq Nunatta radioa nammineerluni aallakaatitassiamik aaqqissuisoqarfilikkamik pilersitsissasoq, aallakaatitassiarlu tunngaviusumik aningaasaqarnermik sammisaqartuussasoq.

Aallakaatitassiaq aningaasaqarnermut tunngassuteqartoq, aningaasat nunarsuarmi sumiluunniit atugaasarnerannut sammisaqassaaq. Nunatta aningaasaqarnikkut inissisimanera pingaarnerutillugu aallakaatitap sammisarsinnaavaa, saniatigulli nunarsuarmi aningaasaqarneq aningaasarsiornerlu ilanngullugit sammisarsinnaallugit.

Aallakaatitassiaq akunnerup affaanik sivisussuseqarluni sapaatip akunneranut aallakaatinneqartarsinnaavoq immiuteriigaalluni, aalajangersimasumillu aaqqissuisoqarfeqarluni. Aningaasanik atuinermut aningaasarsiornermullu tunngasut paasissutissartaasa sammineqarnerini Nunatsinni aningaasaq qanoq atugaasarnersoq, aningaasarsiorneq qanoq aaqqissugaanersoq allarpassuillu paasissutissiissutigineqartarsinnaapput.

Aningaasaqarnermut aningaasarsiornermulluunniit inuit atorfilittut inissisimasut ilisimasaqartullu paasisassarsiorfigineqartarsinnaapput isumasiorneqarlutillu. Taakku saniatigut innuttaasut nalinginnaasut aningaasanik atuinermut imaluunniit aqutsinermut misilittagaat ilisimasaallu paasisassarsiorfigineqartarsinnaapput. Politikerit aningaasaqarnermut sammisaqartartut ilanngullugit isumasiorneqartarsinnaapput oqallitsinneqarlutilluunniit.

Aningaasanut atuinermut siunnersuutit, ilitsersuutit allatulluunniit ilisimasassatut tunniunneqarsinnaasut aallakaatitassiap naalaartartunut saqqummiuttarsinnaavai. Takinerusumik sukumiinerusumillu nassuiaasersuinngikkaluarluni, paarlattuanilli naalisaalluni aningaasaqarnermut tunngasunik ilisimasariaqakkanik saqqummiussisoqartarsinnaavoq.

Naalisakkanut assersuutissarpassuusinnaapput. Ulluinnarni inuuniuteqarnermi aningaasat sumut atorneqartarneri, qanorlu iliorluni aningaasanik atuilluartoqarsinnaanersoq naalisakkatigut siunnersuisoqartarsinnaavoq. Aningaasat pigisat sipporlugit atuinaveersaarneq imaluunniit akissaqarfigilerusutamut katersineq qanoq ilioraanni anguneqarsinnaanersut siunnersuusiortoqarsinnaavoq.

Najugarisamut, innaallagissamut, kiassarnermut, imeqarnermut, meeqqerivimmut, inuussutissanut allarpassuarnullu aningaasartuutaasartut qanoq amerlassuseqarnersut paasissutissiissutigineqartarsinnaapput.

Pisortat suliffeqarfiillu aningaasaqarnikkut ingerlatsinerisa paasissutissartaat saqqummiunneqartarsinnaapput. Suut aningaasaliiffigineqartarpat qanorlu amerlatigisunik, aningaasallu sumorpiaq atorneqartarpat. Nunarsuarmi aningaasaqarnikkut ingerlatsineq ataatsimut isigalugu nunami sumiluunniit aningaasap nalinga ullormiit ullormut nikerartuartuuvoq, paasissutiissutigineqartarsinnaavorlu piffissami atuuttumi aningaasarsiorneq qanoq inissisimanersoq.

Naalisaalluni paasissutissiissutigineqartarsinnaapput nunat ataasiakkaat aningaasaat qanoq taaguuteqarnersut, Nunatsinni kronemut atukkatsinnut sanilliullugit naleqassutsimikkut qanoq nikingatiginersut.

Aningaaserivik GrønlandsBANKEN uagut oqaaseqatitsinnik ukiorpaalussuarni sulisoqarpoq misilittagaqarluartunik ulluinnarnilu atuisuminnik siunnersuisartunik oqaloqateqartartunillu. Aningaaseriviit sullisseriaasii, piumasaqaatit allarpassuillu atuisunut sullissinermi periaasigineqartartut, sulisut oqaaseqatigut aallakaatitsivimmi pulaartoralugit paasisassarsiorfigineqartarsinnaapput.

Taagugassaqarnaraluaqaaq, oqaannartariaqarpungali Nukaaraq Eugenius isumaqatigigakku taperserlugulu, nunarsuarpummi ullumikkut aningaasanit aqunneqartoq mannakkornit sukumiinerusumik ilisimasaqarfiginerusariaqarparput.