Qaammatini kingullerni pisiniarfinni anginerni marlunni sulisut pisisartutik akiliisereeraangamikkit oqartalersimapput; "Ulloq atorluariuk". Pisisartuullunilu akinngitsuugassaanngilaq; "Qujanaq, illillu".
Pisiniarfiit sulisumik taama oqartitsisalernerat pisisartuulluni qiimmaallannartuuvoq nuannerlunilu. Ukiorpassuarnimi pisiniarfimmi sulisoq pisisartorlu karsi akiliiffik qimanneqaleraangat sunnguamilluunniit qarluallattoqarneq ajorpoq, sungiusimaannarsimavarpummi oqartoqassanatalu.
Pisiniarfiit pisisartuminnut ullormik atorluaaqqusisalernerat pisisartuulluni isumaqartorujussuuvoq, oqaasimininnguimmi oqaatigineqartut tusartippaat sullissisup sullitani ajunngitsumik kissaakkaa. Danmarkimiikkaangama pisiniarfinni taama oqarfigineqartarneq sungiusimareeraluarlugu, illoqarfigisanni pisiniarfimmi akileereerlunga taama oqarfigineqaqqaarama tupaallannikuuvunga.
Tupaallangaarama akinngitsuungajappunga, ilami taama oqarfigineqarneq maani pisiniarfinni sungiusimanngingaaratsigu taama oqarfigineqaqqaarluni tupaallannalaarami. Anigamali nuannaajallallunga misigisimavunga, eqqarsarpungami; "Qujanaqaarmi pisisartuusunga ullormik atorluaanissannik kissaakkaanga, kissaatigiuaannarparami ulloq atugara nuannersumik ingerlassasoq".
Pisiniarfinni akiliisitsisartut taama oqartalernerat ajunngeqaaq, sulili amigaateqalaartutut misigisimavunga. Assersuutigalugu danmarkimi pisiniarfinni akiliisarfinni akiliisinneqaleraangatta pisiniartitsisoq inussiarnerluni qungujulaarlunilu akiliisitassami isai toqqarlugit isigalugu tikilluaqquserpalaaqaluni oqartarpoq; "Hej!", akiliisitsereeraangamilu suli taama inussiarnertigaluni ullormik atorluaaqqusilluni oqaqqittarluni.
Maani pisiniartitsisut aamma taama inussiarnertigalutik akiliisitassaminnut qungujulallutillu ilassinnilaartaleraluarpata pisisartuulluni suli pitsaaneruliinnassaaq, ingammik sulisup pisiniartup isai toqqarlugit isigalugu tikilluaqqusutut misigitippagu.
Sullissinermi periutsit suulluunniit pitsanngorsarneqartuarsinnaammata pisiniarfiit kaammattuinnarsinnaavakka, pisisartuminnut sullissilluarnissartik pitsanngorsarniarlugu iliuuserisartakkatik ingerlatiinnassagaat. Pitsanngorsaajuarneq sullitanullu pitsaasumik atugassaqartitsisarneq sullinneqartup uteqqiattualerneranik kinguneqarsinnaasarmat, pingaaruteqarpoq sullitanut pitsanngorsaajuassalluni.
Mikisuulluni pisiniarfilerineq qasunarsinnaavoq.
Ingen kommentarer:
Send en kommentar