SISIMIUT

onsdag den 6. april 2011

Sisimiuni nuna sajummat

Marlunngorneq 5. april 2011 nal. 17:42, angerlarsimaffinni inimi issiavissuarmut ingeqqammerlunga tv saallugu isiginnaaruttulerlugu nateq illullu sinnera nippakkiartulerput. Eqqarsaqqaaraluarpunga aasit immaqa gummigedersuit atitsigoorlutik aqquserngup sermiinik kiliortuerpalulersut. Taama eqqarsarlunga alakkarniassallugit nikuinniaraluarpunga, nippakkiartortorli aqqusinermik kiliortuerpaluttumit allaanerusumik misigiartulerakku suli nikuinnanga aatsaat eqqarsaleriataarpunga; nunaana sajuttorsuanngulersoq. Taamaammat issiaannarpunga utaqqiinnalerlungalu qanoq pisoqassasoralugu.

Sajunnerup malunnarsilerneraniit malunnarunnaarnissaata tungaanut sekundit qulit 15-illu akornanni sivisussuseqarunarpoq, naatsorsuinerliunngikkuma. Sajunnerali malunnarnerpaammat pissanganermik eqqumiilaartumik misigisimaleraluarpunga, issiavigisarami quinarujuttorsuarmik malugivara, soorluli maskinarsuup sakkortuup sajuppilaartitsisullu eqqaaniilluni. Sajukkunnaarmat nikueriarlunga igalaakkut kujatikannitsinnut umiarsualiviup tungaanut alakkarteraluarpunga, nalunngilarami umiarsuit anginerit talileraangamik assut qanngulutsitsisartut. Alakkagarali umiarsuaqanngilaq. Nikueqqammertunga nukarliliarput sinittarfimminiit anillakkami aperivoq; sunaana? Akiinnarpara; immaqaana nuna sajuttoq.

Nunap sajunnissaa sioqqullugu nuliara suliffimminut ataatsimiigiartoq illoqarfiliaappara, unnulaalersorlu angerlarmat aperaara malugisaqarsimanersut. Ataatsimiillutik aallartereerlutik nerrivik sajukulaalermat malugisimavaat, maanilu affarlitsinniittup aamma malugisimanerarpaa.

Tassaana Sisimiut nunataa qaqutiguugaluaq sajuttartoq. Ilaanni malunnarpianngitsumik ilaannilu malunnarnerusumik. 1980-ikkut qiteqqusimalereersut eqqaamavara aasaanerani unnuakkut malunnalaavissortorsuarmik sajummat. Taamani malugilluarneranut pissutaavoq sajulernerata nalaani majuartarfitsigooratta arlaliulluta, allaat uninnissaata tungaanut nikorfaannartariaqarluta, pissangatitaavissuleraluarlutalu. Nunat allat sakkortoorsuarmik sajuffiusimagaangata tv-iikkut takutinneqartartut amiilaarnartaqimmata neriuginnarniarta Nunatsinni taama sakkortutigisumik misigisaqartinneqassanata.

5. april 2011, nal. 17:42 Sisimiuni nuna sajummat illoqarfimmi inuit amerlasuut malugisimavaat.

Ingen kommentarer:

Send en kommentar

Sisimiut assitigut takujuk / Sisimiut in pictures

Digitalimik assiliineq 1996-imi misilittaqqaalerakku assiliivik digitaliusoq akueriuminaatseqqaarsimavara, taamanimi digitalimik assiliiviit pitsaassutsimikkut killeqalaartorujussuupput. Taamaakkaluartoq assiliivik digitali assiliissutigisarlugu taamanili attassimavara, kaasarfimmioriuaannarakkulu sumiikkaluaraangamaluunniit assiliilaartuartarpunga taamaalillungalu Sisimiuni pisartut ilarpassui assitigut malinnaaffigisarlugit.

Malugiuk!
Quppernerup naqqani allaqqasoq Ældre indlæg toorukku siusinnerusukkut assit ikkutat takusinnaavatit.

Since I started using a digital camera in 1996 I was a little doubt about the quality of these cameras back then were very limited in their visual qualities. But I used it anyway until today where I always have it in my pocket, and so I went with the camera of the many that is happening in our city.

Note!

When you press Ældre indlæg at the bottom screen, you can also see other pictures from the past.

SARSUA MEDIA

1996-imi tusagassiortutut naammassivunga Nuummi tamatumalu kingorna aviisi Sivdlek', Sisimiut Tusaataat aammalu Sisimiut TV suliffigisarsimallugit. Sivdlek' ukiuni arlalippaalunni aaqqissuisuuffigaara aammalu Nunaqarfimmiut Aviisiat aqqissuisuuffigisimallugu kiisalu Sisimiut TV ukiuni arlalinni pisortaaffigisimallugu.

Novemberip aallaqqaataaniit 2008 tusagassiortututut namminersortunngorpunga tv-iikkut nutaarsiassalerineq pingaarnerutillugu sulisarlunga. Suliffimineeraatiga taaguuserpara SARSUA MEDIA, tassungalu aallaavigitippara angerlarsimaffitta aqqusernga; Sarsuatsiivinnguup qulaa.

Tunitsivigisartagarali 2009-ip aasarnerani nalunaaruteqarmat namminersortunut pisiortortarnertik unitsinneqartoq, allatut ajornartumik aalajangersimasumik suliffeqalerpunga 2010 aallarnerfigalugu.