Aalibak Augustussen qajaaraliailu

Kusanartuliortartoq Kangaamiormiu Sisimiuni najugaqartoq Aalibak Augustussen, qajaaraliortarpoq kusanarluinnartunik suliarilluagaasunillu.

Qajaararpaaluit arlalissuit naammassisimallugit sianerluni oqaluttuuteriarmanga aperalunilu assiliartorsinnaanerikka, eqqumiitsuliortut sulliviannut ornippara qajaaraliailu assilisaqattaarlugit.

Aalibaap qajaaraliortarneq inuussutissarsiutigaa, suliaasalu ilarpassui Nunatsinnut pisortatigoortumik tikeraartunut tunissutigineqartarsimasut oqaluttuuppaanga. Qajaaraliaasa kusanartut allamiunut tunissutigineqartarnerisigut Aalibaap Nunatsinni kulturi pingaaruteqarluinnartoq taamaalillugu "mikisunnguinnarlugu" nittarsaattuarpaa.

Ungasinngitsukkut illoqarfiup aviisiani Aalibak allaaserisaqarpoq, pinerluuteqarsimasunut isertitsisarfimmiittut aamma qajaaraliortalersimasut. Allaaserisamini uggornartuunerarpaa isertitsisarfimmi - naalagaaffiup ingerlataani aningaasalersugaanilu - suliarineqartalersimammata, allaammi akikinnerujussuanngorlugit niuertunut tuniniarneqartalersimallutik, niuertullu akisuninngorlugit tuniniaqqittarlugit.

Aalibak allappoq, naalagaaffip ingerlataani aningaasalersugaanilu sullinneqartut suliaasa akikinnerusumik tuniniaasalernerisigut, kusanartuliornermik eqqumiitsuliornermillu inuussutissarsiuteqavissut unammillerneqalermata ajuusaarnartuusoq. Tupinnanngitsumimmi suliat akikinnerusumik pisiarisinnaasatik niuertut qinertarpaat, naak ilaatigut suliarilluagaavallaanngikkaluartut.

Aalibaap qajaaraliai atagumi qimerlooriakkit kusanassusii. Neriuppunga suliat pitsaassuseqarluartumik suliarilluagaasut suliapalaanit inangerneqariartulissanngitsut.