Inuiaqatigiinni sullissisut saqquminerusariaqarput

Isiginnaagassiaq oqallisissiarlu WorkingLab.Greenland, 2010-mi novemberi naalluinnalersoq Taseralimmi isiginnaartitsissutigineqarpoq. Tassani takutinniarneqarpoq meeqqanik inuusuttuaqqanillu sumiginnaasarneq Nunatsinni ajoraluartumik suli amerlavallaanut ullumikkut atuuttoq.

Nunatsinni pisimasut piviusut ilaannamininngui allanngortinnagit isiginnaagassiami takutinneqaramik isiginnaartuulluni tiguartinnaqaaq, angajoqqaammi meeqqallu iliuuserisarsimasaat artornartut akueriuminaatsullu isigalugit misigissutsimik sakkortuumik qaffakaatsitsipput.

Isiginnaagassiamik suliarinnittut nassuiaatigaat, ilaqutariinni sumiginnaasarneq ajornartorsiutaajunnaarsikkumallugu inuiaqatigiinni oqallittoqarnerulernissaa anguniarlugu isiginnaagassiorsimallutik. Isiginnaartitsissullu naammat isiginnaarsimasut peqatigalugit oqallittoqarpoq. Isuma ajunngilluinnartoq nersortariaqartorlu.

Nunarput isorartoqigami innuttaasugullu siamasilluta najugaqartiteratta illoqarfiit nunaqarfiillu tamaasa tikillugit oqallitsitsiniartarnerit ajornakusoortut qangali nalunngilarput. Inuiaqatigiit pillugit suliniartut angalassagunik piffissamik sivisuumik atuisariaqartarput assartorneqarnerallu akisuujuulluni.

Inuiaqatigiinni ajornartorsiutit ilaannik qaangiiniarnermut suliniutit tapersersornartaqaat, ingammik isiginnaagassiarineqarsimatillugit amerlanerpaanit takuneqartarnissaat kissaatiginartaraluarluni. Nunatsinnili siamasissumik najugaqaqartiteratta suut tamarmik tikinneqartarnissaat ajornaatsuinnaanngilaq.

WorkingLab.Greenland takoreerlugu eqqarsaasersorninni isumaliutiga unaalerpoq: Oqallinnerulersitsinissamut innuttaasut amerlanerpaat anguneqassappata KNR radio periarfissiisariaqarpoq, radiomi atorlugu Nunatsinni najugaqarfiit 99%-ii anguneqarsinnaapput. Radio aallakaatitassiamik aalajangersimasumik suliaqartussamik pilersitsisinnaavoq, pilersitallu taassuma suliarissavaa inuiaqatigiinni ajornartorsiutit.

Oqartoqassaqqooraluartoq: Aasit ajornartorsiutit! Uanga oqaannassaanga: Arraa soormi! Nunarsuarmi sumiikkaluaruttaluunniit ajornartorsiutit akunnerit tamaasa nammattuugassaajuarput, ajornartorsiutillu qaangerniassagutsigit oqaloqatigiinneq isummersornerlu sakkussaapput pingaaruteqarluinnartut. Ajornartorsiutimmi qanoq iliornikkut pinngitsoortinniarneqarsinnaanersut qaangerniarneqarsinnaanersullu isummersorfigiuartariaqarput.

Isumaliorpunga radiop aallakaatitsisarnermigut inuiaqatigiinni ajornartorsiutaasut paasissutissiissutigisassagai, pingaarnerutinneqassasorli inuiaqatigiinni inunnik sullissisartut aallakaatitsivimmi pulaartorineqartassasut oqaloqatigineqartarlutillu. Suliat pillugit nassuiaatillugit, apersorlugit isummersortillugillu.

Soorunami inuit ataasiakkaat pillugit eqqartuisoqanngilluinnarnissaa aaqqissuisoqarfiup aalajangiusimajuassavaa. Aallakaatitassialli siunnerfigisariaqarpaa, inuiaqatigiinni inunnik sullissivinni assigiinngitsorpassuarni ingerlariaatsit, sullisseriaatsit allarpassuillu paasissutiissutigineqartarnissaat.

Paasissutissiisarnerit oqallittarnerillu piviusunngussappata inunnik sullissisartut nangaassuteqaratik oqallinnermi peqataanerusariaqarput saqquminerusariaqarlutillu. Ammanerullutik suliatik ilisimasatillu pillugit inuiaqatigiinnut paasissutissiinerusariaqarput, minnerunngitsumilli ajornartorsiutit pinaveersimatinnissaannut qaangerniartarnissaannullu isumaliutersornerusariaqarlutik. Soorunami aallakaatitassiap aaqqissuisoqarfia qanimut suleqatigilluinnarlugu piareersaaasioqatigisarlugulu.

Isumaqartungaana radio atorlugu ajornartorsiutit pillugit oqallinneq isumaliutersornerlu ataavartumik ingerlanneqartuarunik innuttaasut naalaartartullu eqqarsaatissanik isumaliutissanillu tunineqartuartassasut, tassalu taanna pingaarnerutitara: Paasisimasatigut ilisimasassatigullu isumassaqartuartitaanissaq.

Aallakaatitassiortut pulaartartussaaleqigunanngikkaluaqaat: Meeqqerivinni sullissisut, atuarfinni ilinniartitsisut, pinaveersaartitsinermik suliaqartut, kommuneni inunnik sullissisut, pisortat suliffeqarfiutaanni inunnik isumaginninnermik suliaqartut, aqutsisut pisortallu, inunnik sullissinissamut ilinniarfinni ilinniartitsisut pisortallu, politiit, tarnip pissusiinik suliaqartut, innuttaasut inersimasut, angajoqqaat, aanaakkut aataakkut, inuusuttut angajoqqaat, politikerit atorfillillu, allarpassuillu.

Ajornartorsiutit qaqilerneqartarnerisa saniatigut aamma pingaaruteqassaaq inuit sutigulluunniit inooqatigiinneranni pitsaasumik ajunngitsumillu ingerlasarnerat sammisassallugu. Inuuneq qanoq ittumik ingerlanneqaruni iluatsittumik ingerlasoqartarpa il. il..

Qularinngilara radiokkut aallakaatitassiaq taamaattoq ataavartumik ingerlanneqartaruni innuttaasut eqqarsaatissaannik isumaliutissaannillu tuniorarneqartuartassasut.