Nipaannersuaq qoqianngunaannarpoq!

Inuiaqatigiit uagut ajornartorsiuteqarluta nalunngilarput. Ullut tamangajaasa radiomi tv-miluunniit tusartarpagut, aviisillu malittarisarsimagutsigit taakkunani atuarsinnaavagut.

Politikerertagut ajornartorsiutinik aaqqiiniarnermi aqqutissanik suliniuteqarlutillu ujartuipput, ilungersorpummi assigiinngitsutigut atornerluisarnerit, imminortoqartarnera allarpassuillu pinaveersimatinniarlugit suliniuteqarlutik.

Suliniutit nutaarsiassatigut allatigulluunniit saqqummiunneqartillugit oqallittoqarnerunissaanik ujartuisut kaammattuisullu arlallit tutsiuttaannarput. Ajornartorsiutit pinaveersimatittassappata oqallinneq malunnaateqarnerusariaqartoq arlallit aqqutissatut tikkuartortarpaat.

Oqallinnermi pisariaqarpoq. Aaqqiissutissat suliniutigineri iluatsikkiartulissappata oqallinneq isummersornerlu aqqutissaapput, allatummi qanoq iliorluni suliniartoqarsinnaagami? Oqallinnerusariaqartugununa isummersornerusariaqarlutalu. Annernartaraluarpataluunniit.

Piffissami qaangiuttumi tusagassiutit malinnaaffigisarneri assersuuteqarfigigaanni oqallinnerunissamik ujartuinerit taaneqartaannarput. KNR radiomi eqqarsaatissiisartoq Abia Abelsen tusarnaarpara eqqarsaatissiinermini kommunenut tamanut kaammattuisoq illoqarfinni oqallittarfinnguanik pilersitseqqullugit, innuttaasut taakkunani katersuuffeqartarsinnaammata oqaloqatigiillutillu.

Peqqissutsimut naalakkersuisoq Agathe Fontain tusarnaarpara kaammattuuteqartoq, imminut toquttarnerup pinaveersimatinniarneqarnerani inuiaqatigiittut tamatta akisussaaqatigiilluta oqallinneq ingerlattuartariaqaripput, oqallittarnertigut imminut toqunnissamik eqqarsaateqartartut ingalassimatinneqarsinnaammata.

Tusagassiortunngorniat ilinniarfianni pisortaq Naja Paulsen, apersorneqarluni oqartoq tusaavara, nunatsinni oqallittarneq amerlanerusunit peqataaffigineqartassappat ilinniarluarsimasut inuiaqatigiinni oqallinnermi peqataatinneqarnerusariaqartut saqquminerusariaqartullu, taakkumi nipaappallaaqaat.

Inuiaqatigiit pillugit oqallinneq eqeersimaarnerusoq tamatigoornerusorlu Nunatsinni amigaatigaarput! Inuiaqatigiit eqeersimaartuunissaannik isummersortartut oqallikkumatuullu saqqumminerusut amigaatigaagut! Oqallittunik isummersortunillu tusarnaarneq eqeersaataavoq inummut kajumissaataallunilu eqiingasumik inuiaqatigiinni sulerusussuseqalernermik tunniussisartoq.

Oqallinnerit ullumikkut soorunami ingerlanneqartarput. Isumaqarpungali aaqqissugaanerusumik ingerlanneqalertariaqartut, amerlasuullu oqallinnermut peqataatissappata aaqqissuussineq qanoq ittoq Nunatsinni periusigilertariaqarneripput aalajangerniartariaqalerparput.

Allaatigisanni siusinnerusukkut eqqaatsiareerpara Nunatta radioa KNR periarfissatsialaasoq oqallinnerup eqeersimaartumik ingerlanneqarnissaanut. Nalunngilara oqallinnernik ingerlatsisartoq, taakkuali suliffiup nalaani inuppassuit tusarnaarnissaminnut periarfissaqarfiginngisaanni aallakaatinneqartarput, taamalu amerlanerpaanit tusarnaarneqarnissaat killeqartarluni.

Imminut assersuutigiguma, oqallitsitsinerit soqutiginartut ingerlanneqassamaartut tusartaraluarlugu, ajoraluartumik tusarnaanngitsoorsinnaasarpakka sulinera unitsiinnarsinnaannginnakku. Naapittakkat ilaat uattulli periarfissaqarneq ajortut nalunngilara.

KNR-imi aqutsisunut, siulersuisuinut sulisuinullu siunnersuutigerusunnaqaaq eqqarsaatigeqqunarlunilu, Nunatsinni oqallinneq eqeersimaartoq KNR-ip pilersittariaqaraa, nutaarsiassat saqqummiuttakkatik - amerlasuutigut ajornartorsiutinut ajornartorsiornernullu tunngassuteqartut - tunuliaqutaat sukumiinerusumik oqallitsitsissutigalugit malinnaavigilissagai.

Oqallittarnerit ulluinnarni sulinerup nalaani ingerlanneqartarunnaarlutik unnulaalernerani inuit eqqissisimaalereerfiini - imaluunniit aamma weekendiuniusinnaavoq - ingerlanneqartaraluarunik qularnanngitsumik malinnaaviginissaannut periarfissaq pitsannguallassinnaagaluarpoq. Amerlasuummi tusarnaarnissaminnut imaluunniit oqalliseqataanissaminnut periarfissinneqakutsoorsinnaapput.

Qulequtsiussara qanoq isumaqartinnerlugu taassagukku, oqallinnerit ingerlanneqarnerini suliffeqarfinni inuiaqatigiinnut tunngasuni sulisut aammalu suliaminnut ilinniarsimasut ilinniarluarsimasullu oqalliseqataasinnaasut maqaasivakka. Qoqianngunaannartumik nipaappallaqaasi! Imaluunniit saqqummernissassinnut tunuarsimaaginnarpisii imaluunniit periarfissaqartinneqanngiinnarpisii?

Inuiaqatigiittut ingerlanitsinnut ingerlalluarnissatsinnullu soqutiginnittusi tamassi kaammattorumavassi tunuarsimaarasi oqallinnermut soqutiginninnersi takuteqqullugu, inuiaqatigiinni atorfissaqarpusi, pisariaqartinneqarpusi.

Siusinnerusukkut allaatigisanni oqaatigereersimasattut eqqaaqqiinnarsinnaavara, oqallinnermi ajornartorsiutit kisiisa oqallisigisariaqanngilagut. Isummersuutit, siunnersuutit, kaammattuutit, qiimmassaatit, nersualaarinerit, pitsanngorsaatit iluarsaatassallu qaqilerlugit isummersorfiginiartigit taava paasinnissinnaasugut isumassorneqassaagut ajunnginnerusumik inooqatigiinnissatsinnut aqqutissiuunneqarluta.

Inussama nuui suli piumagaluartut tamaanga naaginnarallarpakka .....