Naalakkersuisut isumaqatigiinngissutaat

Maanna qularnaatsumik paasisimalerparput Air Icelandimut isumaqatigiissutaaniaraluartoq naalakkersuisooqatigiit isumaqatigiinngissutigigaat, IA-mmi politikkikkut oqaaseqartartuata erseqqissumik uppernarsareerpaa demokraatit naalakkersuisunut ilaasortaatitaata aningaasaqarnermullu naalakkersuisutut akisussaasup iliuusaa IA-p isumaqatiginngikkaa.

IA paasinarpoq, naalakkersuisooqatigiimmi anguniagaat avaqqullugit aningaasaqarnermut naalakkersuisoq iliuuseqarsimappat, ingammillu Nunatta aningaasaqarneranut isumaqatigiissut ilumut iluaqutaassuseqassanersoq qularnarpat, taava partii naalakkersuisuni siuttuusoq qisuariartariaqarpoq.

Aqqaluaq B. Egede isumaqatiginaqaaq, naalakkersuinikkut isumaqatigiinngissutit qanorluunniit ilungersunartigigaluaraangata - soorlu siornatigut taama pisoqartarsimasoq - naalakkersuisooqatigiinnerit isasoornerannik kinguneqartuaannassappata tamanna inuiaqatigiinnut taamak ikitsigisunut akisuallaartartoq, Nunattalu ataatsimoorussamik politikkikkut anguniagaanut kinguarsaataaginnassasoq.

Inuit tamatta kukkujuitsuunngilagut, aamma politikerit kukkusarput. Kukkunerilli paatsooqatigiinnerilluunniit pisimatillugit - ingammik politikikkut suleqatigiinnermi - soorunami aaqqiissutissamik iluarsiinissaq ujartortuartariaqarpoq. Aaqqiisoqanngikkaangat isumaqatigiinngissutaasoq amerlasuutigut ajoqutaaginnalertarmat partiit naalakkersuisuutitaqartut suli aaqqinniagassaqarput.

Suliami pineqartumi malunnartumik naalakkersuisooqatigiit isasoorsinnaanerat pinaveersimatinniarneqarpoq. Pinaveersimatitsineq erseqqinnerussappat naalakkersuisut siulittaasuata naalakkersuisooqatigiinni akisussaanerpaanini takutissaguniuk erseqqinnerusumik inuiaqatigiinnut nalunaartariaqarpoq. Isumaqatigiissusiaq nammineq politikeritut qanoq isumaqarfigivaa? Naalakkersuisooqatigiit kukkunerivaat imaluuunniit oqaloqatigiinngippallaarnerit kingunerivaat?

IA-p naalakkersuisooqatini qinigaaffitsik naallugu suleqatigiinnarniarunik suliaq inernilertariaqarpoq, sulimi isumaqatigiissutaaniartoq naammassineqarsimanngitsoq aningaasaqarnermut naalakkersuisup erseqqissumik oqaatigereerpaa. Suliaq inernilerneqanngikkuni naalakkersuisooqatigiit suleqatigiissutiginiakkaminnut tapersersoqatigiinnersut nalunarsigaluttuinnassaaq.

Naalakkersuisooqatigiit demokratiimik tunngaveqarlutik ingerlasut suleqatigiinnerminnut akunnerminni aaqqiagiinngissuteqaraangata, nalinginnaasarpoq naalakkersuisuni siulittaasoq suliap qanoq inernilerneqarnissaanik naggataatungaatigut aalajangiisuusarluni. Politikkikkut kukkusoqarsimappat siulittaasoq "naveersisarpoq" imaluunniit "inissiisarpoq" (danskit oqariartaaseraat: fik en næse), pisorlu aaqqikkuminaalluinnarsimagaangat naalakkersuisooqatigiit isasoortarput.

Air Icelandimut isumaqatigiissutaaniartoq naalakkersuisooqatigiit avissaarutigissanngippassuk naalakkersuisut siulittaasuata Kuupik Kleistip aningaasaqarnermut naalakkersuisuutitani Palle Christiansen "naveertariaqarpaa" "inissittariaqarluguluunniit", taamami iliornissaminut tunngavissaa maanna paasereerparput, Inatsisartunimi tunuliaqutaasa erseqqissumik oqaatigereerpaat aningaasaqarnermut naalakkersuisup iliuuseriniagaa IA-mit isumaqatigineqanngitsoq.