"Tarrarsuut, tarrarsuut - kina nunami maani pissaaneqarnersaava?"

Nunatsinni naalakkersuisutta isumaqatigiinngissutaat erseqqissigaluttuinnarput. Inatsisartut aningaasaqarnermut ataatsimiititaliaani ilaasortat - aamma naalakkersuisuutitaqartunut tunuliaqutaasut - ataatsimiititaliamiit tunuarnerisa ersersippaat naalakkersuisooqatigiit tunuliaqutaanni "matut matullugit" isumaqatigiinnginneq malunnartoq.

Tunuarnermut suna pissutaarpiarnersoq Naaja Nathanielsenip Niels Thomsenillu erseqqissumik oqaatigiumanngikkaluarlugu, taamaattoq tunuarnerminnut nassuiaatiginiagaasa ersersippaat aningaasaqarnermut naalakkersuisup iliuusaanut peqataajumajunnaartut. Toqqaannartumik oqaatiginngikkaluarlugu.

Niels Thomsen radioaviisip danskisuuani oqarpoq, imminut tarrarsuummi takussaguni ataatsimiititaliamiissinnaajunnaarluni oqaaserlu 'kompromis' atorlugu. Allatut oqaatigalugu, aningaasaqarnermut naalakkersuisup iliuusai pissutigalugit Nunatta aningaasaqarnikkut ajalusoorutigisinnaasai Niels Thomsenip peqataaffigerusunngilai, piffissaagallartillugulu akisussaaffimminiit piiginnarnissani qinerlugu. Oqaaseq 'kompromis' atoramiuk ersersiinnarpaa assigiinngitsumik isumallit isumaqatigiissutigigallagaannut peqataaniarani.

Naaja Nathanielsen peqataarusukkunnaarluni radioaviisimut oqarpoq. 'Peqataarusukkunnaarneq' sukumiinerusumik isumalerniassagaanni, oqaannarsinnaavugut aningaasaqarnermut naalakkersuisup iliuusaanut peqataarusukkunnaartoq, kinguneriumaagassaanullu akisussaaqataarusukkunnaartoq.

Naalakkersuisut imminnut pilersikkamik taamanili taannariuarsimavaat akaareqatigiillutik suleqatigiinnissartik siunnerfilimmillu anguniagaqarnissartik pingaartinniarlugu. Erseqqissarniartarsimavaat akunnerminni isummat assigiinngitsut naapiffeqartittarsinnaagitik, isumaqatigiinngittoqaraangallu tamanna suleqatigiinnermut akornutaanavianngitsoq.

Naalakkersuisulli suliniutaasa ingerlanneqarnerini isumaqatigiinngittarnerit maanna naalakkersuisooqatigiit avissaariartulersimanerannik ersersitsipput. Inatsisartunimi ataatsimiititaliaq pingaaruteqarnerpaaq pissaanermillu tigummiaqarfiunerpaasartoq avissaartuuffiuvoq. Nassuiaatigineqarniaraluarpoq Inatsisartut ataatsimiinneri aallartikkaangata ataatsimiititaliat inuttalersornerisa allanngortiterneqartarnerat nalinginnaasumik pisartoq.

Qularnanngilaq ataatsimiititaliamit tunuartut taamani tassani sulilerseqqaarneqarmata aningaasanik ingerlatsinermut ilisimasaqarluarnissaat pingaartinneqarsimassasoq, naak nutaraagaluarlutik. Qularnanngilaq taamanili ataatsimiititaliami sulinermut sorpassuarnik ilikkagaqarlutillu misilittagaqaleriartorsimassasut, taamaammallu qinigaaffik naalluguluunniit tassani sulinertik ingerlatiinnarpassuk tulluartuuginnassasoq.

Qularnanngilaq ataatsimiititaliap ilaasortai akisussaassuseqarluarlutik isorinnissinnaassuseqarluarlutillu sulisimasut. Isorinnissinnaassuseqarluarnerat takuarput Air Icelandimut isumaqatigiissutaaniartoq pillugu ataatsimiititaliaq sakkortuumik isornartorsiuimmat, nalunanngitsumillu isumaqatigiissutaaniartup kingunissaanik misissuilluarsimasut.

Naalakkersuisulli pissaaneq tigummigaat maanna takuarput, ataatsimiititaliap ilaasortai isornartorsiuisinnaassuseqartut 'peersinneqarmata'. Nammineq kissaatigisamit tunuarnertut taajumaneqarnerugaluarpalluunniit pisut aammalu oqallinnerit ingerlanneqarnerisa takutippaat pissaaneq kimittunerusoq naalakkersuisuniittoq.

Aningaasaqarnermut naalakkersuisoq sakkortuumik illuatungilersorneqarmat isumaqarnarsigaluarpoq siulittaasuminit naveerneqariarluni inissinneqassasoq. Tamannali pinngilaq. Ataatsimiititaliap pingaaruteqartup inuttai akigineqarput, taamalu pisoqarnerata erseqqinnerulersippaalusooq naalakkersuisuni kina pissaaneqarnersaanersoq.

Qulequtsiussaralu oqaluttualiat ilaanni atorneqarsimasoq allanngortilaaginnarlugu taama apererusunnarsivoq: "Tarrarsuut, tarrarsuut, kina nunami maani pissaaneqarnersaava?"

Nalunngilara tarrarsuut akinavianngitsoq, Nunatsinnili politikkimik malinnaasuulluni akissutissaq una allaqqukkuminaappoq: Aningaasaqarnermut Naalakkersuisoq pissaaneqarnersaavoq.