"Meeqqat inuusuttullu siunissaraagut", taama oqariartaaseqarneq inuusuttuaranngulerninni tusartaleqqaarakku siunissaq qanoq ikkumaarnersoq takorlooruminaattarsimaqaaq. Sunami pineqarnersoq inuusuttuaranngulerluni paatsuunganartarsimaqaaq.
Qujanartumilli taamani sukumiinerusumik nassuiaanneqartarpugut. Oqarfigineqarpugummi inuusuttunngulernitsinni ilinniagaqartariaqartugut ilinniarsimasunngortariaqartugullu. Oqarfigineqartarpugut tassaasugut siunissami Nunatsinnik aqutsilerumaartussat, taamaammallu ilinniagaqarneq pingaartittariaqaripput ilungersuullugulu.
Qaqortumi ilinniarnertuunngorniarfiup pisortaa Else Poulsen februari qiteqqulluinnartoq radioaviisimit oqaloqatigineqarami oqaatigaa, ilinniarnertuunngortartut nukangavallaarnerat pissutigalugu ilinniarnertuunngorniarfiup suliassani perorsaanermut allarpassuarnullu atortariaqartarai.
Ajuusaarnaqaaq tusarlugu ilinniarnertuunngorniarfik inuusuttunut suli nukangavallaartunut piffissamik atuilussinnartalersimammat, piffissarmi ilinniagassanut ilikkagassanullu atorneqartussaagaluarpoq, inuusuttut ataasiakkaat ajornartorsiutaat pingaarnerunatik.
Ukiuni makkunani perorsaanermut tunngasut perorsaanermullu ilinniarfeqarnerup inerisarneqarnerata ingerlaruttulerfiani perorsaariaatsimut tunngasut oqallisigineqarnerulersimammata qujanartorujussuuvoq. Nunatsinnimi ilinniartitaaneq inerisartuartillugu meeqqat mikineriniit inuusuttunngulernerannut inuiaqatigiit ingerlanerannut naleqqussarlugit qanoq ineritikkiartorneqassanersut oqaluuseriuartariaqarpoq.
Ukiut ingerlanerini oqallittut oqaaseqartullu malinnaaffigisarnerini tusartuartarpara qangaanerusoq perorsaariaatsip periusigineqartarsimasup meeqqanut ineriartortunut ataasiakkaanut sunniutigisartagai ullutsinnut naleqqukkunnaarsimasut. Taama oqartut isumaqatiginartarput, ukiummi makku inuuffigisagut inuiaqatigiittut ineriartupiloorfigisimaqaagut, allaat immaqa perorsaanermi tunngavissat pingaaruteqartut qaangiataaginnarneqartarsimassallutik.
Inuiaqatigiinni nutarsaleruttorfitsinni avatangiisigut ulluinnarnilu ilaqutariittut inooriaatsigut allanngoriartorsimasut ullumikkut takusinnaavarput. Nassuerutigisarparput amerlasuut katataasimasut, amerlasuullu naammaginartumik inuuneqarnissaat anguniarlugu suli ilungersortariaqartugut.
Ullumikkut inuusuttunngortut ilarpassui suli nukangavallaarlutik ilinniarfinnut ingerlaqqittarsimappata ataatsimoorussassamik aaqqinniagassaqarpugut. Isumaga malilugu aaqqiiniarnissaq Nunatsinni tamarmi angerlarsimaffinni ataasiakkaaniippoq, angajoqqaani, ilaqutariinni, qatanngutaasuni qanigisaasunilu tamani.
Pingaartumik angajoqqaat taakkuupput qitornamik inuusuttunngulernerani ilinniarnerup pingaaruteqassusianik qitornaminnut sukumiisumik oqaloqatiginnittuartariaqartut. Angerlarsimaffik qimattussanngorsimappat inuusuttunngulersorlu nammineerluni siullermeerluni ulluinnarni sungiusimasaminit qimaguttussaasimappat, taava angajoqqaat qitornamik ilisimasassaannut sillimaffigisassaannullu oqaloqatigiittassallutik piareersimajuartariaqarput.
Qitornap ilinnialersup angerlarsimaffini qimatsinnagu paasereersimasariaqarpaa ajornartorsiutinut naammattoorumaagassanut akiuunniarnermini kikkut saaffissarinerlugit aammalu taakku naatsorsuutigiuartariaqarlugit; tassalu nammineq angajoqqaani imaluunniit ilaquttami ilaat. Qitornaasup angajoqqaallu siumoortumik paaseqatigiissutigalugulu isumaqatigiissutigisinnaasariaqarpaat ilinniarnerup nalaani ajornartorsiulerfimmi qanoq iliorlutik aaqqiiniaqatigiissinnaallutik.
Angajoqqaat qitornaminnut tunuliaqutaalluarnissartik tatigeqatigiinnermik tunngavilertariaqarpaat. Qitornaasup angajoqqaani tatigalugit aammalu qaqugukkuulluunniit saaffigisinnaallugit nalunngittariaqarpaa, tatiginninnermigut nalussannginnamiuk ajornartorsiutinik qaangiiniarnermini tapersersortissaqarluni.
Perorsaariaaseq uterfigeqqilaarlara. Ullumi ullup qeqqa sioqqullugu radiomi tusarnaarpara Henriette Rasmussenip pulaartorigaa Pauline Olsen, oqaloqatigiinnerminnilu Nunatsinni meeqqat perorsarneqartarnerat eqqartutsiarpaat. Paaliit isumaqatiginaqaaq oqarmat, pingaartumik nukappiaqqanik perorsaanermi qangaanerusoq tunngavigineqartarsimasut ullutsinnut naleqqukkunnaarluinnarsimasut.
Nunatsinni perorsaasarnerup oqallisigineqartarnerani oqaatigineqartarsimaqaaq, nukappiaqqat sanngiitsooqqunagit sakkortunerusumik perorsarneqartarsimasut. Paaliip oqarneratut taama perorsarneqarsimasut inersimaleraangamik assigiinngitsorpassuartigut atugaqarfigisarpaat allaat misigissutsinut matoqqasuulerlutik.
Ullumikkut nalunngilarput paasereerlutigulu misigissutsit inuttut ineriartornermi pingaaruteqarluinnartut. Aamma nukappiaqqat misigissuseqarput, taakkulu niviarsiaqqaniit allaanerunngilluinnarput. Paaliit isumaqatiginaqaaq oqarmat, qangaanerusoq perorsaariaatsimi pissuserineqartartut atorunnaartariaqartullu nutaamik paasinnittaaseqarluni isiginnittaaseqarlunilu allanngortittariaqarmata. Ullutsinni inuunitsinnut avatangiisitsinnullu naleqqussarlugit.
Else Poulsenip ilinniarnertuut pillugit saqqummiussai, ilinniartitaanermut naalakkersuisup Mimi Karlsenip radioaviisimi oqaaseqarfigigamigit kimittunerusumik eqqarsaatissiisumillu oqaaseqarsimasinnaagaluarpoq.
Uanga isumaga malillugu naalakkersuisup Nunatsinni angajoqqaat kaammattorsimasinnaagaluarpai qitornamik ilinniarnerat namminneq aamma pimoorutissagaat, ilungersuutigissagaat, qitornartik ilungersoqatigissagaat, tamakkiisumik tapersersussagaat pingaartumillu qitornaq meeqqat atuarfianiikkallarnerani malinnaaffigilluassagaat inerisimaleriartorneranullu ikorfartueqataasariaqartut.
11. klasse atuleqqittariaqarnersoq uanga isummerfiginianngilara, isumaqarpungali ilinniarnertuunngorniartut nukangavallaalersimanerat pillugu "uggornarpoq" kisiat politikeritut oqaatigissallugu naammanngitsoq. Aamma politikeritut tiki napparlugu inuiaqatigiinnut oqaaqqissaarilaarneq atorneqalaartaraluaruni ajoqutaasariaqanngilaq, paarlattuanilli inuiaqatigiit ilungersornerusariaqarnerannik tikkuussinertut paasisariaqarluni.
Qitornatta ilaat ukiuminnut naleqqiullutik suli nukangavallaartarmata nassuerutigisinnaasariaqarparput. Meeqqat atuarfiiniit ilinniarfinnut ingerlaqqinneranni nukangavallaarunnaarsissagutsigit meeqqat atuarfianni inuttut inerisarnermut ilinniartinneqartarnerat ilusilersoriartuaartariaqarparput.
Pingaartumik angajullerni atuartuuneranni nammineersinnaassutsimut sungiusarlugit ilinniartinnerusariaqarpagut. Atuarnerup nalaani anguniagalimmik sammisaqartittarlugit, soorlu pinngortitamut angalasarneq, illoqarfik / nunaqarfik qimallugu unnuiartortarnerit amerlanerusut, lejrskolertarneq immaqa sivisunerulaartoq, Nunatsinni illoqarfinnut allanut imaluunniit nunanut allanut paasisassarsiorneq allarpassuillu suugaluarnersut meeqqat inerisimanerulernissaannut aqqutissiueqataasinnaasut qitornatta meeqqat atuarfianniinnerini aaqqusaarneqarsinnaasariaqarput.
11. klasse atuleqqittariaqarnersoq naluara, isumaqarpungali nukangajunnaariartulersitsinissaq inerisimasunngortitsinerlu ilungersornerunitsigut meeqqat atuarfianni qitornatsinnut anguniarnerutittarsinnaagigut. Angajoqqaatut nammineq akisussaaffik tigummivarput, iliuuseqarnitsigullu pitsaanerusumik angusaqartitsisinnaavugut.
Ulloq atualeqqaarfik angajoqqaanit pingaartinneqartaqaaq. Pingaartitsineq meeqqat atuartuunerat tamakkerlugu pingaartinneqartaruni meerartagut angusaqarsinnaasorujussuupput.
Ingen kommentarer:
Send en kommentar