Naalakkersuinikkut suliat suleriaaserlu

Inatsisartut sulinerat aallarteqqammersoq oqalliseriaatsinik ilisarnartunik - ilaatigut piffissaajaatitut taaneqarsinnaasunik - uteqqiattuartunik tusarnaagassaqarfiuvoq. Kingullermik qinersinerup kingorna naalakkersuinikkut siuttut taarsermatali oqalliseriaaseq taanna Inatsisartut ataatsimiilersillugit atorneqarajussivoq, qatsunnarsiinnarluni. Aamma massakkut Inatsisartut ataatsimiilerneranni tusarsaalereerpoq.

Siornatigut naalakkersuinermik siuttuusartut qanoq ingerlatsisimanerat taakkartortuarlugu oqallinnermi uteqattaartuarneqalerpoq, soorluli 'ilissi suliasi ajormata', 'suliassasi suliarisimannginnassigit' il. il. pisuutitsiniutitut ajornerunnginniarnerutitullu taakkartorneqartualerlutik. Qularutissaanngitsumik Inatsisartut oqallisigisassaasa allat pingaaruteqartut ingerlanneqarnissaagaluannut piffissamik tigusisarlutik.

Inuit Ataqatigiit uparuarneqartillutik arlaleriaqalutik oqaatigisarpaat, siornatigut naalakkersuinikkut suliassaasimagaluinngooq pissutigalugit maannakkut suliat ima imatullu ingerlanneqartariaqartut, suliassanngooq qangali naammassisimasariaqaraluartut. Soorlulimi siornatigut naalakkersuisuusartut kisimik ajortuliorsimasut.

Puigorneqartaraarli partiit Nunatsinni naalakkersuisuutitaqartarsimasut paarlakaattumik suleqatigiittarsimammata. Siumut siulersortigalugu Inuit Ataqatigiit Atassullu suleqatigiittarsimapput, taamaammallu suleqatigiit naalakkersuinikkut sulianut akisussaaqatigiittarlutik. Inatsisartulli aamma akisussaaqataasarput, taakku naalakkersuisunut sulisitsisuummata.

Taava sooq siornatigut naalakkersuinikkut suliaasarsimasut kikkut qanoq pitsaanerutigisumik suliarisimaneraat Inatsisartuni anneruniutaajualissava? Allat pitsaanerusumik suliarisimanngippatigit akisussaaqataajumanngissutsimik takutitsineruvaa? Partiimmi naalakkersuisooqatigiittarsimasut Inatsisartuniititaqartartullu tamarmik Nunatsinni naalakkersuinikkut sulianut tamarmik akisussaaqatigiipput.

Oqalliseriaatsip taamatut ingerlaaseqalertarneranut oqaloriaaseq, saqqummeeriaaseq nipillu qanoq atorneqarnera soorunami oqallinnerup qanoq ingerlalerneranik kinguneqariartulersarpoq. Oqaaserisassat sakkortunaarsimagaanni illuatungilerneqartoq sakkortoqataanik akissasoq pissusiulersimavoq naalaartuulluni tusanngunarsinnartoq.

Partiit Inatsisartuniititaat - aammami kommunet siulersuisuniititaat ilanngullugit - kaammattorusunnarput oqalliseriaaseq torernerusoq tunngavilersorluagaanerusorlu atorneruleqqullugu, pingaartumik suliat ingerlanneqartut piviusorpalaarnerusumik paasisimannippalaarnerusumillu oqallisigisassagaat.

Soorunami politikkimut suliat oqallisigineqarneranni sakkortuumik isornartorsiuineq ingerlanneqartassaaq, imaanngitsorli siunnersuutit oqallisigisallu tamarmik taamarsuaq sakkortuuliorfigalugit pissusilersortoqartassasoq. Isornartorsiuinerli sakkortuppat aamma oqaasertalersornera akaarinninnermik takutitsiviusariaqarpoq, imaanngitsoq avissaaraluttuinnarnissamik kinguneqassasoq.