Nunatsinni Naalakkersuisooqatigiit siuttuisa ualeq manna tusagassiortunik katersortitsinerat immikkut taasariaqartoq tupaallaatigineqarsinnaanngitsumik ingerlanneqarpoq. Siulittaasoq qasorpaseqisoq, qularnanngitsumillu ulluni kingullerni oqaloqatigiinnerpassuarnik ilungersunarsinnaasunik ingerlataqarsimarpasissoq nalunaarpoq, naalakkersuisuni ilaasortat ilaat akisussaaffimminnit nikisititerneqartussanngortut.
Qaammatit kingulliit ingerlaneranni politikkikkut oqallinnerit aalassassimaarnerillu kinguneqartinneqartariaqartut naalakkersuisooqatigiit siulittaasuata kiisami iliuuseqarfigaa. Air Icelandimut isumaqatigiissutaaniartoq allallu oqallissutaasarsimaqisut Inuit Ataqatigiit Inatsisartuni ilaasortaatitaasa aalassassimaarutigigaat malinnaaffigisarpagut.
Ataatsimiititaliami nikisititerinerit qularnanngitsumik IA-p Inatsisartuutitaaniittunut aalassassimaartitsisimapput, tamannalu siulittaasup iliuuseqarfigisariaqaraa piumasarineqarsimassasoq eqqoriaannarneqarsinnaavoq. Siulittaasoq politikkikkut malinnaasunit - ingammik tusagassiorfinnit - uparuartorneqarsimaqaaq, allaat sanngitsuunerarneqarluni naalakkersuisooqatiminullu Demokraatinut naalattussiaannartut taaniarneqarluni.
Qujanartumilli Kuupik Kleistip anngaaginnartuunnginninni timitalerlugu aningaasaqarnermut naalakkersuisorisimasani "peersippaa", Nunatta politikkikkut ingerlanneqarnerani akisussaaffiit pingaarnerit ilaanni sunniuteqarsinnaajunnaarsillugu. "Peersitaasup" inuttaanut nuanninngikkaluarpalluunniit siulittaasup maanna naqissuserpaa naalakkersuisooqatigiinni kina oqartussaanerpaanersoq aalajangiisinnaassuseqartorlu.
Aningaasaqarnermut naalakkersuisuusimasup manna tikillugu aqutsisimanera Nunatta oqaluttuarisaanerani aatsaat taama malugineqartigigunarpoq, sukangasuumimmi aqutsinermigut allaanngilaq inuiaqatigiit uagut pillarniarluta Nunatta aningaasatai aqunniarsimagai.
Oqaaseq pillaaneq atorakku pissutigaara, kingullermik Inatsisartunut qinersisussanngoratta Demokraatit qineqqusaarutaat uagutsinnut sullissinissamik siunertaqarpasinngiivissut tusartareersimagatsigit. Ingammik Namminersornermut angerniartunut oqaatigisarsimavaat, Nunarput namminersulerniaruni tamanna aningaasaqarnitsigut malugissaqigipput.
Namminersornermut angeratta pillagaasutut pineqarpugut, aningaasaqarnermummi naalakkersuisuujunnaartup Nunatta karsiata sinneqartoornissaa kisiat anguniarlugu Nunatsinni inuppassuit eqqorsimavai, soorlulusooq eqqarsaannarsimasoq "nammineq pisuupput namminersornermut angeramik".
Eqqaamassavarput danmarkip aningaasaliissutai namminersulernitsigut ikileriarsimanngimmata tunniunneqartartullu suli taakkuummata. Danmarkip suli akisussaaffigisaanik aatsaat tigusinialerutta nammineq akilertussaagipput nalunngilarput, imaanngitsoq namminersorneq atuutilermat akissaarussimasugut.
Maliina Abelsen neriulluarfiginiartigu Nunatta Inui pillugit suliniarnerussasoq, Nunatta aningaasarsiornikkut ingerlalluarnissaanik paasisimanninnerulluni akisussaassuseqarnerullunilu. Ima oqaatigilluaannarlara: Qanortoq-una uummateqarfigaluta sulilluarili.
Naalakkersuisut siuliuttaasuat, qujanaq iliuuseqarsinnaatsumik takutitsigavit.
Siulittaasoq Kuupik Kleist, qasorpasikkaluaqaluni kiisami iliuuseqarsinnaassutsiminik takutitsivoq.
Ingen kommentarer:
Send en kommentar