Unioqqutitsiinnaavissut

Nunatsinni aqqusinikkut angallannermi maleruagassat takussutissartaat (skiltit) amerlanngikkaluaqaat. Taamaakkaluartorli takussutissianik malitassaqarpugut, biilerutta imaluunniit pisuinnarutta. Sisimiunili aqqusinikkut angallannermi biilertartut amerlanerpaat ilisimalluarpaat pisuinnartut ilarpassuisa maleruagassat tamakku qanoq isumaqarnersut ilisimasaqarfiginngilluinnaraat.

Aqqusinikkut pisuinnarnut ikaarfissiat assersuutigiinnartigit: Ikaarfissiat aqquserngup illuatungaaniit illuatungaanut piniaraanni takussutissiat (skiltit) inississugaapput, paatsuugassaanngitsumik paasineqarsinnaallutik qanoq isumaqartut. Napparussuarnut ikkutaapput, ikittaqattaartunillu qulliligaallutik, ikaarniaraannilu taakku aqqutigineqartussaapput.

Angallannermut inatsit misissoraanni, ikaarfissiat tamakku qanoq atorneqassanersut nassuiaasersugaavoq. Tassani erseqqissumik allassimavoq, inuit ikaartussat utaqqippata biilimik ingerlatsisoq piumaguni unikkallarsinnaasoq inuit ikaarsinnaaqqullugit. Allassimasoqanngilaq biilertoq pinngitsoorani unittassasoq, imaluunniit inuit pinngitsooratik siulliusassasut. Biilimik ingerlatsisup nammineq aalajangigassaraa inuit ikaartinnagit siulliussanerluni imaluunniit uneqqaassanerluni.

Inuilli ilarpassuisa ikaarfissat qanoq maleruagassaqarnersut ilisimanngilaat. Amerlanerpaat isumaqalersimapput namminneq pisuinnartuugamik siulliusussaallutik. Taama isumaqarnertik pissutigalugu ikaarnialeraangamik biilimik saneqquttoqalernersoq qiviaqqaanngiivillutik ikaariartarput, ilaasa aportingajalluinnarnerannik kinguneqartarluni. Tassa inuit siulliusussaasorinertik pissutigalugu isumaqaannalersimapput allaat qiviaqqaartariaqaratik.

Angallannermulli maleruagassaq malillugu inuit qiviaqqaaratik ikaartartut kukkupput. Ikaarfissianimi taamaattuni assigisaannilu piumasaqaataasarpoq inuk ikaartigani mianersorfissanut sillimaniartariaqartoq, ajutoortoqannginniassammat. Siulliusussaasorigamilu aamma kukkuvoq, maleruagassamimi allassimasoqanngilaq inuk siulliussasoq.

Ikaarfissiatigoortoqalersillugu biili uneqqaanngikkaangat inuit ikaarniartut ilaat kamaammertarnertik takutittarpaat isumaqaramik siulliusussaallutik, tamannalumi pissutaagunarpoq inuit ilaat qiviaqqaanngiivillutik ikaarniartarmata. Ernumanartoraali ullut ilaanni apuisoortoqarsinnaammat, naak tamanna kissaatiginanngikkaluaqisoq.

Illoqarfiup radioatigulluunniit angallannermi maleruagassat paasititsiniutigilaartarnissaat ilaanni maqaasinartarpoq.